雅虎香港財經 憧憬落空丨樓市放寬「10少辣」 汪敦敬：搞好經濟更重要 施永青：失控先救就救唔到
早前市傳政府「減辣」救市，例如放寬買家印花稅（BSD）及500萬以下單位印花稅象徵式收取100元；不過，特首李家超今日發表任內首份施政報告後，有關憧憬通通落空，最終只會向居港七年的合資格外來人才退還在港置業的額外印花稅。
汪敦敬：對後生仔係好事
對於施政報告提出的措施，祥益創辦人兼總裁汪敦敬表示：「呢份報告我都幾鍾意，係比較長遠，只不過冇短期安慰劑，有心上車人士可以享受一段長時間較平的樓價，對後生仔係好，可以多啲平樓去選擇，市場谷有谷好，唔谷有唔谷好」。
早前市傳500萬以下單位的印花稅象徵式收100元，但最終落空，汪敦敬就認為遲早都要放寛：「政府幾時先肯開呢道門畀年輕人上車呢？即使宜家唔放寛，將來都要放寛，長遠而言政府要準備有呢日去放寛畀年輕人買樓」。
問到樓市何時見底，汪敦敬指：「樓市由本來急跌，到宜家已經見到支持點，交投將會上升，但要等到樓市變暢旺，應該就要坐多一陣，經濟未準備好上升，股市亦未摸到個底，整體經濟未成熟之下，如果去減辣以提振樓市，好處就係沖喜，壞處就係呢道力完咗之後，個市都未好返。我認為先搞好經濟係重要過直接救樓市，樓市下跌係因為悲情同疫情，其實樓市本身係冇事，至於樓價會唔會再下跌，我覺得會比高峰跌約兩成，目前睇跌多5％，就應該見底啦。」
施永青：相關措施作用唔大
政府向居港七年的合資格外來人才退還在港置業額外的印花稅，中原集團創辦人施永青則認為：「作用唔大囉，唔係個個人都有咁多錢支付三成印花稅 ，樓價一至兩成嘅錢拎出嚟都難，仲話三成！等於投資者頭十年都冇租收咁滯啦！」
施永青又指，今次施政報告看出政府對樓市處境的評估，跟市場人士不一樣：「之前財爺都講樓市冇斷崖式下跌壓力，所以政府就覺得唔需要減辣。我認為政府應該設法令樓市有序調整，而唔係失控地下跌，到出現時先去救，就救唔到啦！」
密切留意BossMind動向！立即CLS
