雅虎香港財經 
應開拓社區放映？戲院會否 Pop-up化
美股、外匯、加密貨幣免費即時報價，自選投資組合獲取相關新聞提示。
香港老牌院線UA宣告清盤，另一邊廂全球最大院商AMC股票雖然獲Reddit仔力撐，但萬達集團仍決定放棄AMC控股權，將持股減至9.8%，反映戲院這盤生意真係難做。戲院要求生，改行「Pop-up」路線或許係一條出路。
話說UA執笠消息傳出，有一些居於新東網民緬懷UA主題反而係有一段時期因為大裝修，沙田UA恍如一間臨時戲院，地毯摺起椅子唔好坐兼聽到唔少出面嘈雜聲，成為本地奇特的睇戲集體回憶。值得留意係，雖然觀影感受好「特別」，但期間沙田UA生意唔錯，可見只要有睇戲需要，觀眾即使邊睇邊鬧仍舊會買飛入場。
應推出短期租約
現時戲院最難捱係租貴而三不五時要暫停營業，假如政府又再收緊，唔排除再有院商投降唔玩。經此一役，疫後營運戲院成本繼續高企，睇怕唔少財團都會猶豫仲好唔好涉足本地戲院業務。但戲院又係商場吸引人流重要設施，地產商唔可以特別為院商大幅劈租，又想商場繼續有戲院的話，倒不如讓一讓步，容許院商以「Pop-up」方式經營期間限定戲院。
例如商場有個酒樓或戲院或百貨之類巨舖，就可以用短期租約租予院商。院商簡單間出四、五個「戲棚」，平整地面舖上厚地毯，改用大學課室常見連檯仔的摺椅方便觀眾放零食汽水，再配置放映機及可裝可拆音響系統，而中間劃出大堂配置臨時小食部，賣飛則改用人手賣飛畫飛方式。既節省成本，又可以激發唔少消費者好奇心，甚至吸引長者前來幫襯感受七十年代睇戲體驗。
索性跳出商場
如果商場地點難開「Pop-up」戲院，大可參考近兩年遍地開花的社區放映形式，跟政府或私人機構租用商場以外的場地「Pop-up」，以較低票價吸納不同的社區客，時而播放一些小品微電影，繼而引入影視相關的投資基金，成效隨時比單純開戲院有更大的可能性。
「Pop-up」戲院好處係慳皮且唔使揹住長租約，院商當發現這個商場搞戲院有得做，才一邊繼續經營「戲棚」一邊慢慢與商場業主傾租約，仲可以反客為主以撤走「戲棚」作為討價還價條件。事實上誠品屯門店正係先以臨時店試水溫，及後才決定正式開店。書店公認係本港另一難撈生意，大行家都用的奇招，值得院商參考吧。
相關報道：
