【扮工收風】公司大型活動當日 「M到血崩」請假

同事射波原因特別多，最爆聽過邊幾個？

最近身邊朋友在飯局大呻請咗個超懶女廢青（朋友都唔算係老seafood），日日返工等放工、好似唔憂做咁，除咗開住部電腦玩電話、搽指甲油之外，亦用盡所有辦法推job，最興就係話手頭上已經好多嘢做，同事完全推唔郁佢去做嘢，所以都好驚同佢合作。

不過萬萬估唔到佢連公司搞大型活動都想「no show」，在event前4日開始，已經日日垂頭喪氣，猛話自己好唔舒服，同事聽到都覺得唔多對路，有不祥預感佢有機會在event當日射波，因為傳統射波智慧，呢招係人都識。

到event嗰日朝早，果然即刻收到呢位同事嘅whatsapp，話自己返唔到工，因為「M到血崩」！女士們M到天經地義，但同事一見到就即刻大叫：「嘩！呢條友夠膽死話自己血崩！」可能因為呢位同事個底太花，所以冇人肯信佢。

到活動完咗第二日，呢位同事如常返工，笑住口同大家講：「我今日終於好返好多。」結果有人好抵死咁回佢一句：「唔夠M巾問我攞啦。」就係咁，其他人忍笑忍到癲咗。

【相關搜尋】香港邊間公司有月經假

===================

19網輕鬆爆料熱線，歡迎舉報老細同事19惡行，立即click入去講畀我哋知啦