【扮工收風】同事唔鍾意同你食飯的原因
是咁的,小編朋友反映,返咗新工大半年,最近lunch都成日自己一個食飯,皆因同事好多明明有時都約開自己,但近排突然約親都推,原因都係話約咗人,「下次啦」。
乘勢問吓朋友係咪講錯嘢得罪咗人,似乎又唔覺。
點知最近佢路經pantry,唔小心聽到同事講:「最唔鍾意同佢食飯,一日到黑都講小朋友,邊個想聽?」就係咁,佢先如夢初醒,開始明白點解冇人想同佢食飯。
剛入職冇話題,當八完一大輪公司秘密後,只好講吓屋企,屋企講得嘅得個三歲小朋友,唯有拎佢做同事之間嘅話題。
一開始同事都有興趣聽,講吓報學校、講吓佢駁嘴啲搞笑嘢、睇吓佢啲日常片段、講吓自己點教仔,但原來唔少同事只係禮貌式回應,講多幾次之後,其實冇人想知。
尤其一班同事喺度時,佢哋好快轉其他話題。唯一好啲係同一樣有小朋友嘅同事食飯,大家一齊交流吓湊仔經。但其實大家都唔算好想講小朋友。只係講開大家先附和吓。
朋友仲留意到,有位單身女同事,初時請過自己食飯,近日突然對他不理不啋,行過都唔打聲招呼。
有冇打工仔都有同感?有就請表態啦!
===================
19網輕鬆爆料熱線,歡迎舉報老細同事19惡行,立即click入去講畀我哋知啦