【扮工收風】同事帶菲傭去公司家庭日
好多公司近排興走family friendly 家庭友善路線,所以喺公司同戶外搞好多家庭日,主要鼓勵同事搵一兩日帶吓仔女來公司,睇吓爸媽平日返工情況,又或者搵個機會,趁住公司活動,同屋企人一齊玩。
不過最近有間公司搞嘅家庭日,有同事就竟然帶埋家中菲傭一齊參加,好多同事見到都愕然。
首先,公司家庭日唔同普通朋友聚會,現場老闆好多時都會出現,講吓公司理念等,菲傭絕對係佢唔會預期見到嘅嘢,邊有可能估到有同事咁無sense。公司家庭日嚴格來講都係返工日來㗎。
第二,去到飲飲食食果part,連老闆都要自己拎嘢食,順便同同事chitchat,但你竟然派個菲傭出去拎,然後自己就攬住仔女同其他同事吹水,有冇搞錯?
最正係,全場講緊中文之際,總會夾雜一啲「Yes Mum」同埋叫菲傭做呢樣做果樣嘅命令,仲要好似話個菲傭同大老細講「Ar Sir」,真係十個尷尬。
估唔到一個家庭日,都可以有咁多事,真係大開眼界!
===================
19網輕鬆爆料熱線,歡迎舉報老細同事19惡行,立即click入去講畀我哋知啦