【扮工收風】同事漏糧單喺printer 成8萬蚊個月
潮流興環保,糧單放上內聯網系統,自己糧單自己印,但有大頭蝦兼犯眾憎同事印完唔記得拎,結果人工被周街唱。
平時呢位做PR嘅同事已經好食懶做,返工油指甲、出去做嘢齋吹水,恃住同老闆friend,所以完全唔理其他同事感受。不過同事都睇得好開,心諗可能佢人工唔高,就唔鬼理佢。
點知有一日,同事發現printer位有人拎漏嘢,一睇發現係呢位同事嘅糧單,然後俾個銀碼嚇咗一跳,搞乜鬼乜都唔做但一個月可以賺成8萬幾蚊人工。
一班同事梗係唔gur啦,於是忍唔到口,見人就唱,結果當然全世界都知,有啲咁上下年資嘅同事仲乘勢扭加人工,唯獨當事人人工被爆都懵然不知呀!大家覺得故事教訓係乜?就係無論佢點俾人笑,但唔做嘢都有8萬人工⋯⋯
===================
19網輕鬆爆料熱線,歡迎舉報老細同事19惡行,立即click入去講畀我哋知啦