香港股市 將在 2 小時 12 分鐘 開市

【扮工收風】堆填區報館出萬二蚊「薦人費」請IT

薦人費呢家嘢我知好多公司都會有,一般一千至幾千蚊都已經好唔話得,員工要攞到呢筆薦人費都唔容易,一般除咗要舉薦嘅人獲聘之外,仲要過到試用期,員工先會有薦人費落袋。

有啲公司甚至要獲舉薦嘅員工成功做滿半年,先肯磅水。所以薦人費好多時都唔易拎。 

之但係最近有堆填區報館因爲IT人才短缺,所以出咗內部通知,希望同事舉薦合適嘅IT人才,一經取錄,就有$12,000嘅薦人費!你冇聽錯,今次門檻係非常低,只係取錄就袋袋平安。 

呢筆巨額吸引唔少同事落足力搵人,見到啱心水都叫對方唔理三七二十一見咗先。之但係好多IT人嘅反應都係擔心係一個伏。始終喺報界做IT其實一啲都唔好做,因為老闆同公司上下都未必熟電腦,連搵唔到輸入法都要打去搵IT求救。 

而且報界對IT資源都係慳得就慳。又要你幫公司設計或改良程式,又要你幫公司慳荷包,超級唔好做。 

呢個世界,邊有咁大隻蛤乸隨街跳呀?

===================

19網輕鬆爆料熱線,歡迎舉報老細同事19惡行,立即click入去講畀我哋知啦

【相關搜尋】IT狗的辛酸