【扮工收風】女同事成日約埋去廁所
好記得中學時期,成日都會見到班女同學拉大隊去洗水間,而且去親都好耐,甚至大家對住塊鏡講是非。但估唔到,人大咗入到職場,依然見到呢個奇景。
話說有朋友好苦惱,同組幾位年輕女下屬成日一齊唔見影,而且去親都好耐,急起上來想搵人幫手都好難,自己又入唔到女廁搵。
朋友為咗了解成件事,於是搵咗隔離組相熟的女同事幫手,偷偷地尾隨入廁所,睇吓發生乜事。結果發現……
女同事約埋一齊去廁所,例牌在廁所門口嗰條走廊吹水,明顯想遠離上司工作範圍,唔想俾上司見到或聽到吹水內容。一傾至少十分鐘起跳。
入到廁所,各自用完廁格,就開始對住塊鏡瘋狂補妝,然後又交換試對方的化妝品,討論邊隻好用邊隻唔好用、邊隻貴邊隻抵,一搞又十五分鐘。
幾經辛苦先出到個廁所,就撞到其他team嘅女同事,結果又聚埋在廁所出面條走廊一齊講八卦、講是非、講化妝,結果又一個十分鐘。
朋友問:有咩辦法可以阻止佢哋約埋去廁所?有冇打工仔有辦法?請幫忙獻計。
===================
19網輕鬆爆料熱線,歡迎舉報老細同事19惡行,立即click入去講畀我哋知啦