香港股市 已收市

【扮工收風】老闆永遠唔明 新界人返工難處

落咗八號波啦,得返3號波啦,可準時返工啦!但當你一起身,見到窗出面暴雨到白茫茫一片,你就知落咗波係絕對唔代表返到工,因為颱風走咗,係會留吓暴雨帶。 

但可惜呢個常識唔係個個老闆都識,今朝暴雨,一出門當然向老闆打定底,話「唔好意思呀老闆,屋企嗰頭暴雨,完全行唔到出門,全身濕晒啦,要等細雨啲先出到」。 

點知老闆即刻質疑,「3號波加黃雨咋喎,咁都出唔到門?得你一個同我講你出唔到門咋喎。」 

唔好怪老闆,因為老闆眼中絕對冇合理遲到嘅原因。唔好怪同事,因為一班仲以為新界有牛嘅人係唔會相信新界人會因為暴雨出唔到門口。怪只怪自己住新界,出門口冇天然屏障嘅高樓擋一擋啲風雨、冇天橋直達鐵路站、冇遮冇擋。 

所以新界人絕對唔配遲到。

如果你公司有多一兩個新界人,已經算你好彩,因為同路人來之不易呀!

===================

19網輕鬆爆料熱線,歡迎舉報老細同事19惡行,立即click入去講畀我哋知啦