【扮工收風】被中介抽佣24% 合約工集體劈炮
呢個世界冇永遠秘密,尤其係職場。公司同工唔同酬情況普遍,階級觀念極重,尤其分公司自己請嘅長工,以及由公司搵中介幫手請嘅合約工。
係人都知中介幫公司搵人會抽佣,但抽幾多就一直都係秘密。但有大口上司竟然向同事爆響口,話合約工人工長期被剝削,大爆公司同中介簽咗合約,抽佣比例好狼死,係人工嘅24%。
就係咁一傳十、十傳百,搞到全公司嘅合約工都知道自己應有人工嘅24%去咗中介袋,因此士氣極其低落,甚至有合約同事發起號召,話要搞集體劈炮,逼公司加返人工!
就喺尋日,呢間公司嘅合約工開始咗第一炮,就係集體請病假,長工見到呢個情況,有人體諒,亦有人大罵。體諒原因不外乎覺得佢地人工比長工低一截,但做嘅嘢一樣,咁爭取都叫合理。
反對嘅同事原因得一個,就係佢哋咁搞到全世界冇得放工,因為要打多份工,甚至覺得佢哋有本事可以搵長工做,如果唔係做得合約工,就預咗被剝削。
但有時靠惡真係大晒㗎,聽聞有部分主管已經爭取緊幫部分做得嘢嘅合約同事轉長工。所以邊個敢話打工仔反抗無用呢?
===================
19網輕鬆爆料熱線,歡迎舉報老細同事19惡行,立即click入去講畀我哋知啦