【扮工收風】警察「跳船」轉讀工程
早前討論區有網民都將警察列入現今5大最難撈嘅職業之一,因為對外要承受被人指罵、起底,對內又士氣低落,警察形象大跌,低過消防救護一大截。
小編朋友做警察,原本同大家好friend,whatsapp group大家有講有笑,但近月友人們都多番忍唔住在whatsapp質問佢、串佢、鬧佢,問佢睇唔睇到一哥割蓆、又問佢點解仲要打呢份工、「好仔唔當差」、同佢講佢有得揀等等,小編當然無出聲,因為打囂打一份工,當事人最清楚,唔使其他人去講。
點知朋友近日終於蒲頭,叫大家祝佢學業進步。原來佢已經決定跳船,報讀咗專上院校嘅工程課程,嚟緊九月開學。
佢話其實自己一早盤算好,覺得應該趁後生再試吓唔同類型嘅行業,睇吓邊樣先最啱自己。同埋佢又講到警察份工壓力都唔細,唔太啱無咩抗壓力嘅佢。
事實上跳船又唔使睇得咁政治,小編以前都有另一位朋友,做警察係享受巡邏,後來仲將巡邏經歷出埋書(比較年長的讀者可能會睇過本書),同樣都係想試新嘢,後來佢都無再做警察了。
其實每份工都有佢難頂嘅地方,亦都無分貴賤,但工作壓力太大而離開,而又搵到新路向嘅,點都會支持朋友!
===================
19網輕鬆爆料熱線,歡迎舉報老細同事19惡行,立即click入去講畀我哋知啦