香港股市 將在 5 小時 27 分鐘 開市

【扮工收風】陪老婆產檢當「病假」

病假定義人人唔同,其實好多大發慈悲嘅公司,都容許員工一個月裏面可以有半日至三日病假,唔使交醫生紙,所以好多打工仔為咗唔好蝕,一個月都起碼俾自己「病」一次。

不過,最近聽到公司有男員工,竟然誠實到在申請病假嘅備註一欄中,寫上:「medical appointment with wife」,上司望住呢個備註,心諗,究竟係呢位男同事病,抑或老婆病? 

於是上司忍唔住直接問佢,估唔到對話內容相當有趣: 

上司:medical appointment with wife即係點?

同事:唔講得,係秘密……

上司:吓?你咁樣我好難批

同事:咁你應承我唔可以同其他人講,我老婆有咗,我陪佢睇醫生。

上司:恭喜晒,但咁點解係你請病假?

同事:醫生講話可以請病假。

上司:我估醫生係同你老婆講,依家你老闆同你講,你下次可以請假,但唔該請事假!你依家可以返出去喇!

同事:你記得唔好同人講,未到3個月唔講得…… 

其實呢,備註真係唔一定要寫,如果真係想寫,請你寫嗰陣,自己考慮清楚先! 

===================

19網輕鬆爆料熱線,歡迎舉報老細同事19惡行,立即click入去講畀我哋知啦