香港股市 已收市

【扮工收風】Farewell飲茶4000蚊 老闆即鬧冇家教

每次Farewell,都係敲老闆一筆嘅好時機,但做人好來好去,都唔好做得太盡,否則明明開心事,都變咗不歡而散。 

最近有朋友間公司餐Farewell飯,就搞到唔多happy喇。話說要走嗰位同事份人非常識得搵著數,平時返工都周圍𢱑著數,乜都要拎得大份過人,人哋同事去旅行買返來嘅手信,佢一來就自己拎走咗一大半,平時同事食飯又只係嗌晒自己中意食嘅嘢。所以佢餐Farewell飯,大家都係抱住「送走瘟神」嘅心態。 

但估唔到嘅係,Farewell飯飲茶,呢位攞著數攞到盡嘅同事,竟然一來就拎晒點心紙狂嗌,仲要係嗌到成枱貴價特點,老闆因為遲來,一來到見到成枱嘢都嚇咗跳,已經問咗句「食唔食得晒?」 

其他同事當然即刻割蓆,話係嗰位同事一個人自己拍板,因為佢last day,大家都交俾佢話事。結果十個人食呢餐飯,剩到成枱餸,冇人食得落,埋單仲偷睇到好似成4000幾蚊,只係飲餐茶但都4000幾蚊,老闆似乎都嚇咗跳。 

見到大家咁無衣食,老闆都即場開拖,爆咗句:「你到底有冇家教?叫到成枱餸又食剩咁多?」同事聽到當刻塊面已經谷到紅晒,但其他同事好明顯就大快人心,返到公司仲唱晒俾隔離組聽。 

所以唔好以為last day就可以為所欲為,就係因為你last day,大家先唔使俾面你!

===================

19網輕鬆爆料熱線,歡迎舉報老細同事19惡行,立即click入去講畀我哋知啦