雅虎香港財經 【投資專欄】點解個個都話要買蘋果？ 蘋果軟又得，硬又得，供應鏈管理屈曬機（CFO講年報）
iPhone外表係唔係elegant 見仁見智，但係望完佢嘅季績，我就覺得佢盤數好elegant ，就好似微軟嗰種輕描淡寫就賺到一個開嘅感覺，而且佢嘅財務表現相比微軟，係過之而無不及。
1. 蘋果每年係九月尾做年結，所以2021年10-12月係佢2022財政年度嘅Q1) ：總收入有破紀錄既USD1240億，無錯，係1季就有千幾億美元生意，差唔多一萬億港幣，（微軟一季只有USD500億收入倒）。比2021年度Q1增長左 10%， 其中賣硬件有1044億， 增長9.1%， 服務收入有195億，增長23.8%。
2. 總毛利率有43%， 硬件收入毛利率38% 同比升3%，服務收入毛利率72%，同比升4%。我冇check太遠年期，check咗由2018年到2022財政年度嘅Q1，硬件毛利率同服務嘅毛利率都係一直向上升緊，代表佢多年嚟維持到高業務效率，代表佢賣硬件提價能力好強，服務收入就更加提升到70%以上，因為做服務其實真係唔需要太多額外嘅邊際成本，只要前期平台打做得好 （IOS)，甘樣服務收入以後就會愈做毛利率愈高。服務有咩收入：iCloud, Apple Pay, apple care 仲有遊戲subscription 平台apple arcade, advertising, 又收所有app 開發商約30% distribution commission,因為你要喺AppStore 上架。
3. 除咗毛利率好強，佢啲費用成本嘅控制都係好elegant， R&D研發費用佔總銷售收入嘅5%，銷售同埋行政管理費加埋都先至係總銷售收入6%，如果有睇我講微軟嗰篇分析，佢嘅R&D要11%，我已經讚到佢識飛，咁樣蘋果我簡直覺得佢係呃緊人！究竟有冇做R&D？洗甘少錢？你每年都鬧話佢新iPhone冇新意，但係你又係繼續買買買。因為其實佢嘅護城河好深，佢只要每年加少少野，唔使花費太多R&D，你就會鬧住買。如果有睇我Facebook條片，Facebook啲R&D係佔總銷售收入嘅21%，你就知道Facebook嘅護城河無乜，下次文字再詳講FB。
4. Apple 扣晒所有費用之後佢一季嘅純利有340億，呢個bottom line 仲多過Facebook一季嘅總收入330億top line ，同時都多過微軟一季純利 220億一大截，呢下又係好有霸氣。
5. 佢服務收入得195億一季，以為始終好依賴硬件，但係其實呢個數已經係除咗賣iPhone之外，係佢收入來源第二高，因為賣Mac機都係得109億，iPad 72億，但係服務收入有成73%毛利率.....真正嘅不勞而獲。
6. 另外一個現象我都覺得好特別,就係佢嘅應付帳款，最近呢兩年度嘅Q1，應付帳款都有增加差唔多40%至50%，呢個唔係代表蘋果冇錢找數俾佢啲供應商，反而係佢對佢啲代工供應商越嚟越有話事權，數期可以再拖遲啲找，我相信無一個供應商會去嘈佢或者減少供貨。大家見到佢第一季出手機係有增長，但係明明供應鏈係緊張，點解佢都做到咁出色嘅供應鏈管理？當然佢哋真係出色，但更加重要嘅係佢係最惡嘅，如果你係TSM，如果你產能有限，加上供應鏈緊張，你第一時間供貨俾小米先定供貨俾蘋果先？
7. 如果有睇我之前講台積電嘅Q4業績，仲記唔記得台積電係最近呢一兩季係預先收佢嘅客戶訂金先至可以預留產能俾啲客，呢個現象係同蘋果大大增加左應付帳款恰恰相反，即係話台積電夠惡要收訂金先至保證產能俾客戶，但係就唔會係收蘋果，反而蘋果就調返轉可以更加拖你多啲數。所以點解市場都話蘋果供應鏈管理咁犀利。
7a. 另一個係Q1季績發現佢屈機嘅地方係，原來佢會將一啲零部件賣斷”sale of components to these vendors who manufacture assemble final products” 俾佢啲手機代工生產商，等嗰啲代工生產商組合完成為最後產品iPhone 時再賣返比蘋果，呢個係代表蘋果喺未收到iPhone之前，其他零部件嘅坐貨風險inventory risk 就shift 咗俾佢啲代工生產供應商去承擔, 即係話當人哋未切完部iPhone嘅時候，先要擺啲錢喺蘋果度，變相其實喺iPhone生產嘅流程當中屈咗iPhone生產商坐住本身係你啲貨，要生產商坐住你啲貨，變相其實就係俾佢地更加大壓力去哋快啲砌你部iPhone出貨俾你，因為你生產線地方俾佢霸左，你又有舊錢擺咗喺佢度，所以點解話點解蘋果供應鏈管理咁強！
8. 蘋果手機喺全世界智能手機既市佔率大概係22%倒，其餘就係俾Samsung, 小米, Oppo, Vivo 瓜分，而智能手機既作業系統，蘋果既IOS市佔率大概都係20幾%倒，剩餘七成幾都係用Google 嘅Android。用iPhone咁你一定係要用iOS做作業系統，但係用Android作業系統， 你就可以揀Samsung、小米、oppo、vivo。甘代表啲咩？
9. 甘代表，你用開iPhone 就好難轉其他品牌手機。 你用開 Samsung、小米、oppo、vivo就相對會容易轉其他品牌好多。因為你用開IOS，叫你轉換另一個作業系統Android，你會好抗拒，因為要有重新適應新手機作業系統嘅代價，剩係叫你transfer data諗起都煩，點解我要浪廢時間去學另一個作業系統，又要transfer data ,又要download 過哂啲app, 即係話你用開iOS嘅叫你轉去Android嘅阻力同代價太大。
10. 而且用開iPhone嘅人主觀印象都覺得iPhone個security好好多，耐用性又高好多，其他配套都好啲，係我嘅角度（IPhone user嘅角度），我淨係識分iPhone同埋唔係iPhone，Samsung 都還好，但係我真係已經唔係好識分小米、vivo同oppo嘅機殼分別，但係無論你係任何Android 機嘅用家，你都應該一定認得iPhone。
11. 但同樣嘅道理，係Android 嘅世界就apply 唔到，用開小米嘅，下次可以轉Samsung, oppo, vivo，因為作業系統都係用Android，作業系統就唔會係android機用家轉換品牌既阻力，即係話，Android 界嘅手機品牌轉換一定比iPhone密好多。
12. 其他智能手機生產商嘅問題就係只管硬件不管軟件，變成沒有獨特嘅護城河仲要同Google合作，結果要係android 世界營營役役，不斷競爭硬件，而蘋果就係總之係硬件iPhone個名後面個數字+1 就會大賣，我個人覺得呢個就係蘋果最核心嘅護城河。同埋愈富有嘅國家地區，iPhone嘅覆概率愈高，因為iPhone打高端貴價，Android 機就大部份打價格優勢。
13. 蘋果係2021年第四季再一次成為全球智能手機出貨量第一位，市佔22%。呢個係因為蘋果嘅iPhone 13係喺2021年第四季推出，王牌新機一推出，當然就即刻搶番市場第一位，所以喺2021年頭幾季話小米已經贏咗蘋果只不過係一個seasonal factor 嘅現象。
14. 我成日都係度諗，做科技公司，究竟著重硬件重要啲定著重軟件重要啲，有人覺得係軟件，因為當軟件開發成功後，以後嘅業務邊際成本就會好低，想增大業務量只要著重市場推廣、用家感受提升就可以啦。
15. 但如果著重硬件，想做多做大個生意，就要增加生產線，就要增加資本支出同埋需要以年計既擴產建設時間，仲要煩埋供應鏈限制問題。
16. 但蘋果好似俾左我地答案，佢既要做好硬件，善於管理各重要部件供應商，唔會俾你一廠獨大，又要堅持開發自家軟件IOS， 牢牢套住所有用家同埋Apps 開發商同幾乎所有軟件公司，無一倖免。
17. 而家嘅Tesla會唔會好似Apple咁，軟件最終成為佢無可匹敵嘅護城河？其實Apple 都會做Apple Car, iPhone 同IOS嘅成功，會唔會令佢後發先至.....
＊文章獲Cfo講年報授權刊登，原標題為《#CFO講年報 #蘋果 #供應鏈管理大師 #做軟定做硬》
免責聲明：本網刊載的所有投資意見，只可作參考用途。讀者在作出投資決定前理應審慎，並主動掌握市場最新狀況。若不幸招致任何損失，概與本網無關。而本集團旗下網站或社交平台的網誌內容及觀點，僅屬筆者個人意見，與本集團立場無關。本集團旗下網站對因上述人士張貼之資訊內容所帶來之損失或損害概不負責。
你或許有興趣
【抗疫股】港人瘋搶連花清瘟膠囊抗疫，製造商以嶺藥業2月累彈17%
【市場熱話】小米創始團隊之一不達標準被「勸退」？新浪網：小米創始團隊成員李偉星離職
【富衛上市】路透：富衛最快2月底申請在港上市，擬集資20億美元
【投資專欄】內房出事，物管會點行？碧桂園服務依然是最強物管（馬達投資）
【美股解密】Rivian或成Tesla最大競爭對手，前者獲多個重磅基金支持
如欲觀看更多相關文章，請瀏覽 Market Digest
