【拉闊投資】收租樓、收息債做核心資產(小勇哥)
上星期,我哋討論咗香港樓市同埋美國股市都係當地人藏富嘅地方。我哋住喺香港,要掌握樓市,既方便又容易;至於美國股市,以香港資訊咁發達,只要肯研究,要理解亦唔難。建立自己嘅資產組合,除咗要注意藏富嘅地方,更要分散。除咗股票同埋地產外,債券及外匯係唔少得嘅。
因為已經踏入人生下半場,小勇會將有穩定回報嘅資產,作為組合嘅核心資產,買樓收租同埋買債收息都係我嘅心水。債券唔係追求升值,最重要係唔會爆煲,當然2008年金融海嘯嘅教訓,令到我哋明白到雷曼兄弟同埋AIG都可以出事,所以要揀大到不能倒、政府要救或者有保障嘅企業。
近呢十年,全球央行狂放水,所有資產都升值升唔停,只有錢(現金)最唔值錢,要將儲錢嘅概念轉為儲資產。最好嘅資產當然係我老婆李紫晶推薦嘅雙優資產(即係又升值又有現金流)。不過,呢類資產並不常見,要下很多功夫。
所以,對一般人嚟講,唔爆煲嘅債券已經值得做核心資產,然後利用現時低息環境借錢做槓桿。我唔反對借錢,借用對沖基金之王Ray Dalio嘅概念,借錢提高回報係好槓桿;借錢消費先係壞槓桿。
主攻6厘息回報債券
我買嘅主要係有6厘左右回報嘅債券(大概係BBB至BB評級),但現在越嚟越少,舊年第三季搵到一隻之後,已經仲未有心水。買樓收租都一樣,依家喺香港買樓收租只有兩厘左右回報,我已經好耐無加注港樓。而且,小勇年紀漸大,持有流動資產(債券)好過非流動資產(港樓),所以舊年只加了債券。
咁美股呢?股票波動率較高,年紀越大越要減少。不過,我都有股票,同樣都要建立核心持股,主要是大型藍籌美股及藍籌港股,特別是要有衍生工具,可以做期貨或期權對沖或收期權金(當係買股收租),始終要有現金流。
買大股最緊要夠成交
我自己吼嘅都係爆煲機會好低嘅大股,平日成交要夠,業績有分析員及基金跟蹤,多啲人睇實,爆煲機會又會再低啲,以上全部都係由風險角度出發,之後先會睇回報。呢類大股派息穩定甚至有增長(港股為主)或有大量現金及業績持續增長(美股為主),再加上用期權收取期權金提高回報,或者用期貨對沖下跌輸錢嘅損失,最終的目的是將派息資產的成本降到零。
下期講外匯的作用。
小勇哥
Yahoo Money Talk客席主持、投資達人
本欄逢周四刊出