【拉闊投資】股票作為半被動收入(小勇哥)
武漢新型肺炎疫情波及全國,截至前日確診24,324人,死亡490人,只是兩個月時間,兩個數字都超越咗2003年8個月嘅沙士疫情。千祈唔好以為今次肺炎致死率低過沙士,就掉以輕心。任何一個地方嘅醫療系統都有極限,如果病人太多超過系統負荷,死亡數目將急增,但唔係因為肺炎而係失救。
香港終於有第一宗死亡個案,18個確診1個死亡,致死率5.6%,比起疫情最重嘅武漢4.3%仲要高。香港亦係大陸以外第二個地區有人死,同菲律賓齊名。反而,鄰居廣東省近900個確診都未有人死。唔怪得之,越嚟越多港人寧願返大灣區生活好過。
現實香港無助又無奈,都係講返自己控制到嘅嘢!我講過建立財富組合,要留意藏富嘅地方,港人藏富喺樓市,美國人就喺股市。另一樣要參考嘅嘢,就係熟悉程度。我喺香港長大及生活,投資港樓自然有優勢,港股亦一樣。
運用期權提高回報
買股票,我分兩類。一類屬核心資產之一,重視現金流,要求盈利增長,派息穩定。我亦會用期權提高回報,當收多次息。亦因為要操作,所以呢種做法是半主動半被動收入。不過,這種方法與炒股的目的不同,不是賺股價上升嘅錢,而是賺波幅及時間嘅錢。隨着時間過去或波幅收窄,收入(期權金)便提高,好似買樓收租咁。
另一類股票主要是品牌股,包括global同local brands,主要投資長青企業(消費、金融)或者未來企業(科技、互聯網)。這類股票隨着增長而升值。不過,全球股市波動加劇,我用期權對沖(目標不是賺期權金),減少買賣次數,降低交易成本。
Global brands最多嘅市場當然係美股,而我最熟悉嘅市場就係香港,最快增長嘅係中國,所以中港美三地股票,我都有涉獵。以前以港股最多,但近年更愛中美股票,中國領導人支持股票市場嘅力度,從未好似依家咁高;美國嘅總統雖然亂出招,但對美股始終如一,呵護備至。中美兩地嘅policy都係撐股市,反而港股開始出現policymaker discount,反應有時太慢。即使市盈率全球最低,機構投資者掃貨意欲唔高。
小勇哥
Yahoo Money Talk客席主持、投資達人
本欄逢周四刊出