【拉闊投資】買低風險債 兩年賺兩成（小勇哥）

由於債券牛市持續多年，全球負利息債券已經超過1萬億美元。

在過去多篇文章，介紹了我的財富組合，包括樓、債、股、滙及生意5類資產。今次由核心資產──收息債及收租樓再講起。小勇嘅債券組合通常持有4至6隻債券，全部均是美元債券，因為唔使理會滙率變化嘅因素。現時持有4隻美元債券，組合平均息率5至6厘。

由於債券牛市持續多年，全球負利息債券已經超過1萬億美元。債價係咁升，小勇唔想冒太大風險，只好要求回報低啲但穩健啲嘅債，寧願槓桿呢類債好過博高息債但要冒爆煲風險。

中銀飛機租賃債 財息兼收

小勇昨日沽出咗2027年到期嘅中銀飛機租賃美元債，呢隻債券已經持有咗兩年，由2018年5月91.85美元買入，息率4.36厘，昨日以105.1美元賣出，息率得番2.4厘。以債價上升14.4%再加上收咗兩年4.36厘債息，兩年總回報高達23%。

武漢肺炎對中國經濟打擊好大，航空業過去兩個月已經癱瘓，復蘇無期。內地民航局開會話，關注航空業經營風險，會再降稅減費，支持國內航空公司合併重組。中銀飛機租賃嘅客仔今次好大鑊，拖數甚至走數機會大增。既然獲利咁多，加上以後只有兩厘四回報，賺咗落袋，換馬第二隻債券好過。

中國大陸近年開始主動處理政府相關債券剛性兌付嘅問題（即係唔畀爆煲），搞到大陸散戶諗都唔諗風險，一味貪高息。呢幾年內地人民債已經打破咗剛性兌付，去年開始，國企美元債亦出現違約，天津物產及青海省國投兩隻美元債相繼違約，青海省國投向投資者提出以36%至41%本金收返。如果唔接受，就渣都無剩！

北京大學開辦嘅企業方正集團亦都出事。方正集團債權人北京銀行，昨日以方正未能還債向法院申請將方正重整。我相信，所有中資美元債都要re-pricing，特別係國企，將來一定會買到回報更吸引嘅中資債。

風險增加，小勇賣咗中銀飛機租賃後，計劃換馬到短債，舊年喺香港上市嘅亞洲物流公司一直有發美元債，近日又計劃發五年債，息率唔錯，小勇正研究買呢間公司嘅舊債定新債，下期講過答案畀大家知。

小勇哥

Yahoo Money Talk客席主持、投資達人

本欄逢周四刊出