揀財經書三大竅門
書展又開鑼,一如往年,各大書商重點項目離不開財經、旅遊同飲食。想在書展用優惠價入手啱用的財經書,最好掌握三大竅門。
先借後買:
唔少投資新手,逛書展時會集中揀投資入門書。其實這類書水準很參差,單靠在書展求其揭幾頁就入手很容易中伏。倒不如先到公共圖書館行一圈,揀幾本回家刨,刨完發覺有用的,只要書齡唔太舊,一般都可以在網上或實體書店補購。此竅門好處係零成本完成篩選程序,總好過花了幾百蚊最後捧了一堆得物無所用的「印刷品」回家。
留意課題時效性:
有一定「炒齡」的投資者,則可能會選擇投資趨勢為主題的財經書。無疑唔少趁書展推出的財經書,都會以投資界人氣話題為賣點,但只要你仔細揭一揭,或會發現內容原來是作者在報刊、Blog甚至FB Page長文的結集,如果書商為了趕書展,未有花工夫在編訂上,文章內容的時效性就成疑。例如分析講買樓的投資書,結集文章都是在特首公布「娥六招」前發表的,內容就未免與樓市最新趨勢有一定落差了。
判斷班底斤兩:
香港人十個有九個都心急,所以唔少人在書展或書店揀財經書,都會靠認作者名或出版社名,簡而言之就係認「名牌」。揀作者的話,當然係越出名越好,特別是經常在媒體曝光的專家,對投資新手有一定吸引力。問題在於這些專家分析可能都係只求穩陣,甚至講咗等於無講,比「燈神」更缺乏內容。
至於出版社,確實有部分出版社強項係財經書,但正因為已有品牌效應,多年來出品的財經書排版及設計上都一成不變,讀起來像是催眠書。所以與其一味認名牌,倒不如把眼光擴闊些少,嘗試從一些初次涉足出版財經書的本地出版社,又或台書出版社的翻譯作品中尋寶,或會有一些意外驚喜。
可能會有人撥冷水,現在個市咁悶刨財經書未得個刨字。其實市悶正是睇書學嘢好時機,市旺時你日炒港股夜炒外匯、ADR,連食飯都都係匆匆解決,又怎會捨得花時刨書呢,難得現在港股繼續悶,就不妨把握機會提升自己的投資功力吧。
===============
財經精選資訊網站「中環街市」 臉書粉絲頁