操盤手札記│中移動季績見隱憂（割柑人）

中移動以估值低、派息高見稱，兼具有國企活化、數碼經濟兩大概念。 (miya227 via Getty Images)

沽軍作戰！一個星期以嚟，中港股市拾級而下，到昨日始喘穩，滬股跌1點，港股反彈139點；不過，港股午市曾升285點，尾市升幅唔見咁橛，而且由上周一高位至昨日低位計算，累跌1,343點或6.4%，可見沽軍攻勢猛烈。恒指前日失守250天牛熊線（現處19725），昨日回試該線並收於其上，報19757，後市要能企穩始有望轉勢，否則繼續尋底。後市除咗睇預計本周召開嘅中央政治局會議（4月、7月、10月、12月召開，但10月唔一定開），仲要睇下周美國聯儲局議息。

下載Yahoo財經APP

美股外幣即時報價 多國新聞任睇

中央政治局4月會議慣常會為首季經濟形勢定調，並為下一階段政策作出部署。據《彭博》報道，由於中國經濟復蘇已步入正軌，政策重心或會轉向喺唔實施額外刺激下，提振企業信心、增加就業、促進房地產市場發展。事實上，自2021年12月中起，領導層多次喺政策會議提到嘅「三重壓力」——需求收縮、供給衝擊、預期轉弱；本月上旬，央行喺首季貨幣政策例會嘅聲明已刪除相關措辭。市場憧憬今次政治局會議，會將「三重壓力」調整為「三重改善」。

中國經濟次季料勝首季

誠然，中國經濟正在復蘇，上周二公布嘅首季GDP，按年增長4.5%，好過預期，兼係4個季度以嚟最高。當局預計，次季更會好過首季。要注意係，首季房地產開發投資仍跌5.8%、固定資產投資只增5.1%、工業增加值只增3%，都差過預期，經濟單靠消費品零售額增5.8%撐起。大家記唔記得，上年次季係中國經濟最差嘅季度，皆因上海3月28日起封城，6月1日始解封，因此當季GDP基數較低，今年次季GDP增長較強唔奇。

本月係次季開局，跟住係「五窮」、「六絕」月份，呢季喺預期政治局會議有好消息、預期GDP有較強增長下，投資策略應該係縮定係谷？不妨睇下芬佬首季操作捉下路，中國主動基金持倉顯示，港股倉位有所下降，當中，港股主題基金增持通訊、石油石化、電腦等板塊，如中移動（941）、中海油（883）；減持社會服務、醫藥生物、金融等板塊，如美團（3690）、藥明生物（2269）。「公募一哥」張坤管理嘅易方達基金，減持名單更有「股王」騰訊（700）。

基金首季重倉買中移動

邊啲股份可谷，邊啲股份要縮，芬佬已畀貼士。首季基金增持規模最大嘅係中移動，而睇港股通首季數據，中移動亦登上北水成交榜第三位，錄得淨買入116.2億元。中移動以估值低、派息高見稱，加上具有國企活化、數碼經濟兩大概念，近年吸引一眾大戶散戶追捧；不過，中移動上周四公布嘅首季業績顯示，集團喺收入按年增長10.3%，純利按年增長9.5%嘅背後，暗藏三大隱憂，想入貨或已有貨嘅投資者都要留意。

首先係扣除非經常性損益嘅純利只增加0.3%，而對純利貢獻最大嘅係交易性金融資產公允價值變動（即擺錢喺銀行收息），佔37億人民幣；其次係雖然純利增加，但現金流減少3.3%，而且應收賬款增加270億人民幣，相對純利亦只281億人民幣；第三係「網+雲+DICT」收入只增加23.9%，低過同業中聯通（762）、中電信（728），而且只佔總收入11.7%，未成增長引擎。近半年嚟，中移動股價拾級而上，近日高位整固，券商中長線仍睇好；不過，與其高追不如等回調低吸。

割柑人

www.fb.com/hkstockpicker

本欄逢周四刊出