雅虎香港財經 操盤手札記│大叔的愛VS大媽的愛（割柑人）
上周五歐美股市齊升，美股三大指數更創新高，道指首破35000關，收報35061，升0.7%。不過，中國監管擴大，中概股遭拋售，尤其教育股、科網股。港股ADR比例指數收報27066，較港股收報27321低0.9%。本周焦點落喺美國副國務卿訪華、美國聯儲局議息。萬般行情歸於市，睇上周五恒指同期指跌勢，估計中美關係難望改善，恒指支持位睇「兩隻腳」低位26861。
美股、外匯、加密貨幣免費即時報價，自選投資組合獲取相關新聞提示。
上周全城最矚目盛事，竟然唔係奧運開幕，而係同日ViuTV旗下男團Mirror、Error出席屯門商場活動，大批Fans通宵霸位守候，率先體現奧運選手嘅堅毅精神。Mirror成員主演嘅電視劇《大叔的愛》10日前大結局，收視率達7.9點創新高，同TVB（511）同時段劇集收視率嘅差距，收窄至6.3點創新低。ViuTV母公司電訊盈科（008），儼如Mirror、Error同《大叔的愛》槪念股。
留意市場資金流向
《大叔的愛》係同性愛情喜劇，要講槪念股，不得不提「LGBTQ」社群，即係Lesbian、Gay、Bisexual、Transgender、Queer，隨着社會愈趨多元包容，呢個社群亦愈見市場潛力，喺美國上市嘅中概股藍城兄弟（美：BLCT），正係針對呢個社群，其社交應用軟件Blued，喺中國、亞洲其他地區包括印度、韓國、泰國、越南嘅LGBTQ社群，市場佔有率第一，又正在拓展拉丁美洲。
不過，中概科網股監管風險高，未宜入市。若想入市，要留意市場資金流向，例如北水走向。北水即係中國南下資金，傳媒慣以「大媽」泛指中國投資者。市場始終追求有增長嘅股份，北水口味亦左右市場表現；跌市之下，仍然錄得北水淨買入嘅就係「大媽的愛」。上周北水連續5日錄得淨流出，累計流走173億元，但中移動（941）卻連續5日打入五大淨買入榜。
中移動回A料獲批
值得注意嘅係，中移動上周四大升2.9%之餘，兼獲34.8億元大成交配合，罕見成為第四大成交活躍港股。當日中移動錄得北水淨流入13.7億元，換言之，近四成嘅成交嚟自北水，更登上北水淨買入榜首。翌日，北水大流走，中移動仍錄得淨流入逾1億元。點解中移動成為「大媽的愛」？皆因同業中電信（728）返回A股上市獲中國證監會批准，中移動回A亦可望獲批。
北水大手掃貨，相信亦關業務事。中國三大電訊商公布6月營運數據，中移動5G新客增長近倍至2,875萬，相對中電信增666萬、聯通（762）增724萬，月度增長基本持平，中移動明顯跑贏競爭對手，成為支持該股向上嘅基本因素。該股現價50.1元，市盈率7.9倍，股息率6.6厘，走勢上，10天線升穿20天線。大媽向來偏愛業務穩股息高、有好消息跟尾嘅股份，中移動啱晒胃口，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
