操盤手札記│戰場上的快落港股（割柑人）

港股三周內出現六個下跌裂口，尋底格局，本周或將下試19500。 (champc via Getty Images)

兩場戰爭困擾港股！其一係硝煙四起嘅俄烏之戰，其二係無硝煙嘅中美金融戰。前者戰場同香港相距7,659公里，後者則「埋身」得多。Recap一下戰情，俄烏方面，俄羅斯2月24日入侵烏克蘭，截至上周，經過三輪談判仍未達至停火；上周五，美國聯同G7、歐盟，撤銷俄國最惠國待遇。中美方面，上周四，美國證監會（SEC）點名5隻中概股，納入預定除牌名單，引爆中概股股災。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

美國向俄國、中國左右開弓，美股連跌兩日，道指、標指、納指上周五分別跌0.7%、1.3%、2.2%；追蹤93隻美國上市中概股表現嘅納斯達克金龍中國指數，繼上周四下插一成後，上周五「再下一成」；港股ADR比例指數低水495點或2.4%，藍籌中槪科網股ATMJN，美國股價分別較香港低6.5%、4.7%、9%、11%、4%，事實上，美國掛牌港股驚現「滿江紅」！

三周出現六個下跌裂口

港股三周內出現六個下跌裂口，尋底格局，本周或將下試19500。睇周線圖，連跌四周兼四枝大陰燭，過往出現呢個情形，反而係將見中期底預兆；若果反彈，阻力位先睇上周一下跌裂口底部21327。本周焦點係美國聯儲局議息，市場預期將以0.25厘起步，並會暗示可能加快步伐，本港時間周四凌晨2時開估。順帶一提，美國昨日起夏令時間，美股今日起提前一小時開市。

息、戰、疫持續困擾港股。疫情爆發兩年多以嚟，以香港總染疫人數相對總人口計，染疫機會率超過9%，比起中六合彩安慰奬（奬金40元）機會率1.64%，中招機會更大！又講返戰，中美金融戰其實並非新事，前年12月，美國前總統特朗普已簽署《外國公司問責法》；上年12月，SEC通過修訂該法，要求美國上市公司交出審計底稿、證明並非外國政府控制，連續3年違規將被DQ。

騰訊風險較阿里京東低

SEC上周公布嘅準DQ名單，5隻中概股上榜 — 百濟神州（6160）、百勝中國（9987）、再鼎醫藥（9688）、和黃醫藥（013）、盛美半導體，都係2月尾至3月頭發布上年財務報告，隨着更多中概股發布財報，將有更多上榜。準DQ名單一出，中概股即見恐懼鬥「質」，話之你係咪上榜。上周五，美國第一上市中概股市值最大嘅阿里巴巴（9988），其美國存託股票（ADS）更失守85港元關口！

值得注意嘅係，中槪股之中，騰訊（700）跌得冇咁傷，因為騰訊並非喺紐約交易所或納斯達克交易所掛牌，而係以美國存託憑證（ADR）形式喺美國場外交易市場（OTC）交易，而OTC現時未見受到限制；而且，騰訊冇喺美國公眾公司會計監督委員會（PCAOB）具「審核風險」名單之上，該名單260間公司中，超過九成係中槪股，包括準DQ名單中嗰5間，仲有阿里、京東（9618）、百度（9888）等，照咁睇，騰訊被DQ風險相對冇咁大。

割柑人

曾任財經記者、編輯，在本港報章撰寫財經專欄逾十年

www.fb.com/hkstockpicker

本欄逢周一刊出