雅虎香港財經 操盤手札記│銀行業危機 一波接一波（割柑人）
每逢周五倍擔心！本月10日嘅周五，初創企業「大金主」美國矽谷銀行（SVB）倒閉，由聯邦存款保險公司（FDIC）接管；本月17日嘅周五，瑞士第二大銀行瑞信（Credit Suisse）財務危機被逼賣盤，由瑞士政府牽線瑞士最大銀行瑞銀（UBS）接盤，其後瑞銀以30億瑞郎，市價四折收購瑞信；到上周五，輪到德國最大銀行德銀（Deutsche Bank）陷窘，其信貸違約掉期（CDS）合約成本創逾4年新高，反映市場對其債務違約風險擔憂。
美股外幣即時報價 多國新聞任睇
德銀上周五突然宣布贖回一批二級票據，此舉通常係對市場表明其資產負債表具有實力，但消息無助提振市場信心，反令股價沽壓加劇。呢個情況係「先沽後問」（sell first, ask questions later）嘅典型操作，反映市場對銀行業信心虛怯。德銀股價一度跌14.9%，收跌8.5%；德銀CDS升至220基點，係2018年底以嚟最高。德國總理同歐洲央行行長相繼開腔，試圖緩解市場對德銀嘅擔憂；美國財長亦召開緊急會議，會後聲言銀行體系仍穩健。
5月八成機會暫停加息
歐美銀行危機衝擊全球金融市場，上周五，英、法、德股市分別跌1.3%、1.7%、1.7%；美股先跌後升，三大指數升0.3%至0.6%。資金流向避險資產，國債價升息跌，美國10年期債息一度跌穿3.3厘，收3.37厘；美滙指數重上103，收103.12。美銀策略師警告，投資者對經濟放緩嘅擔憂加劇，正以疫情以嚟最大規模湧入貨幣市場基金，預計未來幾個月股市同信貸市場將會大跌。據EPFR Global資料，過去4周貨幣市場基金吸資逾3,000億美元。
全球收水，債息倒掛接近一年，對銀行嘅盈利能力同流動性都有相當影響，終於本月歐美銀行接連爆煲，歐美央行面對通脹壓力同金融風險，如何平衡進退維艱。上周，美國聯儲局加息0.25厘，聯邦基金利率上調到4.75至5厘，議息聲明冇再出現「持續加息」字眼；點陣圖顯示，今年底利率中位數預期仍為5.1厘，本輪加息周期近乎見頂。最新利率期貨顯示，5月暫停加息機會為83.2%；7月更可能減息，機會為53.1%。
內銀長揸未必有升有息
銀行爆煲事件主因，市場歸咎加息太急，令銀行所持債券急速貶值，引致流動性不足。下間爆煲會喺邊間？以矽谷銀行嚟按圖索驥，資產負債表最相似嘅，竟然係聯儲局！初創企業喺QE期間易得融資，存錢喺矽銀，矽銀負債（liabilities）增加；相對嚟講，銀行因QE而存更多錢喺儲局，儲局負債增加。同時，矽銀同儲局都因加息令資產負債表內嘅美債虧蝕，資產（assets）縮水。不過，儲局唔係普通銀行，有需要可印錢，唔會破產！
歐美銀行接連出事，內地銀行未見異樣，加上今日正式降準，可作放貸嘅資金增加，內銀股可否睇高一線？雖然內銀股屬高息股，四大內銀（建工中農）股息率都有8厘或以上，扣除一成股息稅後仍有7厘或以上，但並非筆者杯茶，一來股息率雖高，派息比率卻低，只有約三成，相對大部分中資股都將派息比率提高至五成或以上，如中資電訊股、石油股，明顯被比下去；二來每年只派一次息，又被滙豐（005）、恒生（011）派季息比下去；三來長揸未必「有升有息」，四大內銀中，2010年7月中上市嘅農行（1288），現價2.88元，仍比當年招股價3.2元潛水一成。
割柑人
www.fb.com/hkstockpicker
本欄逢周一刊出
