雅虎香港財經 高息股｜避開「高息股陷阱」 揀高息股收息都要有技巧
買高息股，都係想有一份穩定收益。市場上有咁多隻收息股，有啲又話有8厘息，有啲又或派特別息，究竟應該點揀好？高息係咪就係好？派特別息係咪特別好？投資賺錢當然唔係咁簡單，以下我哋一齊睇下揀高息股有咩技巧。
避開「高息股陷阱」
有時遇到經濟轉差、又或者係公司業務轉差等等因素，股份股價下跌，會派息嘅股份呢個時候就會因為股價下跌、股息率就上升。如果因為見股息率升高而衝入買貨，其實就係喺股價下跌時「接飛刀」，最後賺息蝕價，賺到嘅股息都唔夠冚蝕咗嘅股價。例如部分內房股在債務風波中輾轉下跌，股息率自然反向上升，但一旦買入，未收息都已經蝕到入肉。
「特別息」係有特別原因先會派
計算股份的股息率時，一次派特別息就可以推高股息率。不過要留意，「特別息」之所以咁「特別」，係因為嗰似派「特別息」係屬於一次性，有「特別」嘅原因先派，唔係成日有、唔係年年有，所以你計咗今次嘅股息率特別高，並唔代表下一次都會咁高㗎！
「特別息」有時會喺一啲值得紀念嘅日子出現，例如上市10周年、20周年，又或者出售部分業務等業務重組活動帶來一次性收益，所以派息回饋股東，但並不代表下一次都會有。如果將特別息計埋股息率計算，以為買咗高息股，就好有可能失望而回。
留意公司自由現金流
自由現金流＝營運資金—資本支出
公司嘅「自由現金流」，可以用嚟還債、回購、或者作為股息回饋股民，自由現金流愈多，即係公司愈有財力派息。
Check下公司係咪負債纍纍
留意公司嘅資產負債表中，現金同債務有幾多。如果公司喺資產負債表上嘅債務增加，但又同時增加派息，今年係夠派，但下年呢、下下年呢，係咪可以安心收息呢？如果公司負債纍纍，最終都係要削減派息。衡量債務可以將公司負債與EBITDA比較，將個數值跟同類股比較，數值愈小愈好，然後你就知道呢隻股份派息係咪可靠。
睇下公司嘅派息歷史
參考下公司嘅派息歷史，特別係經濟差嘅時候，公司嘅派息政策有無受到影響、有冇減少派息、有冇暫停派息咁，咁你就知道即使喺經濟差嘅時候，自己係咪都可以安心收息啦。最明顯嘅例子，就梗係要數滙豐啦，話派唔派，令不少股民大失預算呢！
延伸閱讀：
