香港股市 將在 1 小時 25 分鐘 開市

【敢批TVB山頭文化】我都想公司有個汪阿姐

琴晚睇台慶有個估唔到嘅亮點-汪阿姐致辭,睇到一眾打工仔拍哂手。

 

話說大台50周年台慶,節目尾聲時搵嚟兩位重量級員工致辭,

第一個係工程部首席顧問,第二個係汪阿姐,

其中阿姐講到:

 

「TVB就好似一座少林寺,希望大家可以繼續增值,TVB要繼續帶領整個行業,希望各位同事可以裝備自己去打呢場仗。」

 

TVB係少林寺?點解呢?

阿姐接住就講咗呢番說話:

 

「同時,我亦都希望公司可以好好珍惜我地每一位,如果公司嘅人工加多啲,休息時間多啲啲,關心多啲啲,山頭文化少啲啲,一定可以發掘同挽留多啲人才,士氣會更加開心同高漲。我哋可以好自豪話來自TVB。」

 

嘩!既為員工爭取人工待遇,又敢於畀意見公司,

連山頭文化都敢批評,

呢番說話,實在係要阿姐呢種,

TVB服務50年,佢做咗47年,先有資格同份量去講。

試吓係出爐視后唐詩詠講?即刻畀人打入冷宮,

即使係Do姐講,都唔夠阿姐咁鏗鏘。

提到要「好自豪話來自TVB」,既講出員工期望,

又畀返面公司,實在高招兼大方得體。

 

但係以一間公司嚟講,

通常有呢種資格嘅人,都已經上哂岸,

鬼會理班後生有冇人工加咩。

加人工留人才?山頭文化阻公司進步?

好多問題同苦況,都係得下層先知,

中層又唔夠班出聲,

高層當然唔想理,

但係冇下層嘅付出,又邊度搵到咁多錢嚟養你班高層?

 

阿姐既有資格份量同地位,講嘢又有條理,

如果我公司都有個咁嘅阿姐,

可以令高層忌佢三分,又有偈傾,

同時令下屬後輩敬佩信服嘅做工會主席就好啦!

 

香港好多公司都冇工會,

有事起上嚟,唔係個個員工都肯團結行動,

即使有工會,都需要一個夠號召力嘅人物。

所以,我都想公司有個汪阿姐呀!

我唔介意每年周年聚餐都畀佢出嚟唱歌架!