散戶成立黃門 沈大師成最大贏家

沈大師與黃國英這對股壇冤家，終於可以在網上平起平坐。皆因近日有連登仔為黃國英開帖取名「黃門」，揚言要拜「黃腳鷹」為祖師，與大師的「沈陣營」打對台，有弟子形容，兩派就如武當同少林一樣，都是江湖上的大門大派。

論燈力，今年黃國英明顯穩佔上風，不過新門派並起，亂世一條小魚關心的，除了燈力，莫過於掌門人的個人實力。

論資產，支持黃國英的騰訊啦啦隊成員經常指出，黃國英管理資產規模億億聲，沈大師只係高級打工仔一名。但管理資產顧名思義代人管理，億億聲資產都唔係自己，真正落袋的是管理費。更何況強如美國星級對沖基金，今年都出現摺埋潮，所謂億億聲的規模，一而再失手就可能去如浮雲。

反而可惜的是沈大師分析加術數，其實頗合內地富貴客戶的口味，若然他早年肯落水創業的話，獲大客注資億億聲同樣唔出奇。

股票資產實力方面，大師長年睇淡，又一早揚言一股不留，而「黃門」掌門所謂大手押注，亦可能是以其管理的基金出擊，致兩者難以比較真正實力。所以七除八扣之下，最客觀的比較工具就剩下港人最愛的磚頭。

如果比磚頭的話，大師就注定蝕底。

皆因大師曾透露無樓在手，但「黃門」掌門在多年前訪問已自爆手持三個物業，分別位於愉景灣、薄扶林及九龍塘，這三件都擺明係靚貨，如果持有至今，單計磚頭「黃門」掌門就肯定大勝。

相反，沈大師經常睇淡港樓，而且每次都睇得極淡。結果大師估中樓市調整，卻因對後市太悲觀，令自己錯失入手磚頭機會。

掌門人實力強橫，加上「國英當立」呼聲四起，散戶轉投黃門不絕於耳。不過最大贏家應該還是沈大師，皆因大師今次終於洗底，加上其對手「黃門」經常點評的股份如騰訊已步入大起大落Mode，短線波幅難以收復失地，反而大師所謂「大沈判」一錘定音，長遠估死一個方向，實在立於不敗之地；更重要的是，當有人跟「黃門」玩逆向投資「珠玉在前」，至少2018年，大家也難再用大師借題發揮了。

來源：連登

===============

財經精選資訊網站「中環街市」 臉書粉絲頁