雅虎香港財經 新劇曝光！《飛虎之雷霆極戰》及《那些我愛過的人》播出後由呢兩套劇接棒
無綫8點半及9點半黃金檔期正在播放《降魔的2.0》及《飛虎之雷霆極戰》，而口碑不俗嘅《降魔的2.0》將會喺下星期大結局，緊接《降魔的2.0》出街嘅就係由林文龍、黃翠如、馬貫東及連詩雅等人主演嘅《那些我愛過的人》，宣傳短片亦經已陸續播出。另外，《飛虎之雷霆極戰》就播出冇耐，不過視評人方以文喺社交網站就講咗邊兩套劇接佢哋棒播出。
緊接《那些我愛過的人》於7月13日播出嘅就係由楊明、陳曉華與高海寧等人主演嘅《迷網》（前名《網絡騙案》），故事主要講述網絡欺詐騙案，網絡安全及科技罪案調查科高級督察司徒忠（楊明飾）與剛畢業嘅見習督察蕭美婷（陳曉華飾）係上司下屬嘅關係，佢哋破解一連串嘅案件，之後仲日久生情。而司徒忠前女友張慧（高海寧飾）係一位婚禮統籌師，雖然佢工作與婚姻有關聯，但偏偏與自己丈夫沈子浩（黃祥興飾）婚姻關係出現問題，之後仲墮入網絡世界情場騙子嘅圈套。
而接《飛虎之雷霆極戰》棒於6月29日播出嘅就係由黎耀祥、陳豪、李佳芯、龔嘉欣、江美儀及高海寧等人主演嘅《殺手》。劇集以職業殺手行業做背景，講述喬星（陳豪飾）及閻武（黎耀祥飾）同樣都係殺手，佢哋有共同嘅敵人，之後更因聯手結下不解緣。劇集除咗題材吸引及唔少打鬥場面之外，演員嘅造型亦相當突出，好似飾演殺手嘅龔嘉欣喺劇中將頭髮剷青及飾演單親媽媽嘅李佳芯（Ali）就一頭大曲髮加戴上眼鏡。另外，Ali仲會獻出佢第一次唱劇集插曲，到時大家拭目以待喇！
