日本七仔強勢告終
人口老化對經濟衝擊有幾勁,睇老人大國日本就知道。因為後生仔少,便利店長年請人難,終引爆日本七仔唔開通頂亂局。最新情況係日本七仔決定借勢止血,勁減逾千間分店。
日本七仔今次出手,頗有「攬炒」味道。既然之前班特許經營商老闆控訴請唔到人自己做到嘔,咁就不如減分店讓這班小老闆休息一下。一不離二,開得刀就順便重整無肉食的百貨店,於是旗下崇光、西武及伊藤洋華堂超市亦宣告勁減三千名人手。
沙盤推演,作為龍頭七仔今次出手,意味過去日本便利店鬥多分店時代將告落幕。新玩法可能係寧願一個小區有間較大的便利店,方便整合人手解決請人難問題。
另一趨勢係大城市黃金地段便利店將走高檔路線,受制於人工上升、10%消費稅衝擊,黃金地段便利店再走平價路線等同白做,倒不如改頭換面做高級版。事實上七仔強敵Lawson的高級版,匯聚來路貨及健康食品,在黃金地段已做得有聲有色。
最後趨勢係日本便利店企業將專注老本行,昔日因為百貨業務價殘,大把銀兩在手的便利店企業樂於出手收購搞多元化。但當日本國民表態應對消費稅會加大力度縮皮,意味百貨店核心客源中、老年人會再流失,百貨業無得做,銀行業面對電子支付、虛擬銀行等新戰線,亦要一段轉型期,唯有集中精力做好老本行。
對香港人來講,日本百貨店買少見少,便利店不再一街有幾間,最大不便係晚上補給無以往咁方便,特別係郊外小區可能連唯一一間便利店都消失,日後自駕遊到鄉郊就更加要在道之駅入定補給品,減少搵唔到便利店風險。
===============
精選資訊網站「中環街市」 臉書粉絲頁