日本製造利多於弊?
近來唔單止無得去日本,連帶「日本」兩個字都變得敏感。不過有單日企動向消息仍引起唔少人討論,就係Iris Ohyama決定將口罩不織布轉移到日本生產,假如日本製造再次蓬勃,對日本競爭力仲係咪利多於弊?
日企調動生產線回國,最大誘因係日本政府豪擲2200億日元作為資助,但今時唔同往日,並非各行各業掛上「日本製造」都可以輕易大賣。即使係日本本土市場,由教人打扮的漫畫到日本消費雜誌,都建議消費者揀衫睇價錢同個款,質地可以接受就唔強求「日本製造」。
另一生活必需品智能手機,近年日本消費雜誌則力推又平又好用的中國牌子平機,篇幅更明顯教日本品牌大得多。不過關乎健康的產品,日本本土消費者就較傾向相信「日本製造」,例如日本牌子大陸造口罩在疫情下於日本都滯銷,日本OL及師奶寧願買「日本製造」布料整布口罩,令唔少商店要劈價清貨,相信Iris Ohyama都係睇到此現象而決定重置「日本製造」生產線。
「日本製造」另一難題係唔夠工人,日本人口老化領先全球,一間廠點樣自動化都要請工人,更何況部分產品係標榜手作工序,估計唔少廠商計過數後,寧願放棄百分百「日本製造」的光環而把生產線術到東南亞地區。所以「日本製造」要令廠商及日本經濟利多於弊,除了係揀選日本本土及海外消費者覺得「日本製造」信得過的產品類別如食品、藥品、嬰兒用品或烹調廚具,走高端路線的產品如家具、影音器材,就要重拾「日本製造」的「初心」。
六十年代「日本製造」牌頭在品質上無乜優勢,松下電器推電視系列,反而標榜「日本製造」係融合和風的設計,所以電視機都取名「嵯峨」,以討好日本消費者或海外對東方文化好奇的用家。
這個賣點到今時今日其實仍有市場,只要看看本地高級家具店引入的日本手工家具,一張沙發賣過萬元仍不愁銷路,就知道「日本製造」以和風設計作賣點再以質量助攻,即使難以回到八十年代稱霸世界的成就,但要在市場企住陣腳長仍有一定勝算吧。
===============
精選資訊網站「中環街市」 臉書粉絲頁