香港股市 已收市

有婆婆去HKTVmall買嘢,點知唔收現金⋯

最近有兩件事,開始感受到香港嘅無現金時代,快要來了。第一件,係唔少醫生診所,就算唔收信用卡都已經有微信支付,第二件事,就係王維基HKTV Mall實體店,開到筆者所住屋苑。

如果要講筆者佩服嘅一個人,就係王維基。

唔係佩服佢早年「魔童」形象創新、有諗頭,而係佩服佢可以專心做好一件事嗰種精神。如今嘅王維基,叫做專心搞好HKTV Mall,所以見到網店實體化呢種咁新鮮嘅營運方式(至少在香港是新),都不得不佩服Ricky又再開創先河,至少,就算馬雲行出嚟講到自己啲超級市場點勁點勁,香港都已有無現金超市嘅試點。

事實上之前盒馬鮮新一出,市場熱議香港嘅新零售到底係點,「百佳HKTVmall」?抑或「Citysuper+美食廣場」?

今次就係想講講HKTV Mall實體店嘅使用體驗。筆者所住屋苑,HKTV Mall正正就係開喺百佳收銀出口對面﹗保證一定有師奶人流,連宣傳都慳番。

試過一兩次購物,都係要先在網上登記,運作係好似順豐咁去「提貨」;不過同順豐唔同嘅係,HKTV Mall店內有貨品陳列,仲有大大個凍肉櫃,如果想要買凍肉,唔使再等送貨,只要即時上網「網購」,再喺店員面前完成stocktake交易就得。

不過問題就來了,見有位婆婆,以為HKTV Mall係超市,入去拎咗一大堆貨,然後想去支付,結果係唔收現金;店員同婆婆解釋要用手機開App上網買,結果婆婆意興闌珊,將堆貨放番喺度離開。

另一件事係,見一位已經有網購戶口嘅人去買凍肉雜貨,但店員要掃來掃去先完成到交易,最後所花時間,仲長過去街市買包和牛。

電子支付無錯係為咗便利購物,但如果交易拖長,又係咪電子支付原意?或者真係香港人要適應嘅「交易成本」太高,要成功還需要一段時間,而更重要嘅係,婆婆有無必要適應呢種新購物方式呢?呢點值得商榷。

講到底,阿婆只係想買包麵。

(不過港視HKTVmall絕對唔可以睇少,筆者身邊唔少中年主婦,已經漸漸習慣,同埋HKTVmall今年3月收購Groupon香港改埋名叫HoKoBuy,未來有意將實體店開到30間,加起上來都已經係半個新零售王國了,至少唔使依附百佳同759阿信屋,便可生存。)

阿里巴巴無人商店好似仲勁

===============

財經精選資訊網站「中環街市」  臉書粉絲頁