雅虎香港財經 
東京奧運摺埋 場館可以點用？
日本執政自民黨幹事長指假如疫情進一步蔓延，取消東京奧運係選擇之一。假如東奧難逃一摺，啲場館可以點樣「轉廢為能」？
執政黨放聲氣話打算放棄東奧，除了因為日本第四波疫情確係來勢洶洶，另一深層次原因估計係近日「倒水落海」風波，令日本與周邊國家關係變得緊張。本來日本政府宣告會決定將核廢水倒落海，鄰近亞洲國家固然大反彈，連歐美等國都不能出聲話撐，更難搞係出名多口的副首相麻生太郎表示日本核廢水好安全，用來飲用都無事，此言一出日本在核廢水事件的公關角力上就更處於下風。
美股、外匯、加密貨幣免費即時報價，自選投資組合獲取相關新聞提示
倒水風波殃及東奧
核廢水事件再發酵落去，亞洲多國有機會索性杯葛東京奧運，反正今屆奧運無海外觀眾又要冒染疫風險參與，倒不如唔玩仲安全，留力北京冬奧。在此情況下，用疫情升溫作藉口話唔搞不失為講得通下台階。
東奧終極摺埋，估計日本民意未來一段長時間都唔會支持再申辦，多個場館唔想變空置大白象，就要動腦筋轉型。最就手係選手村，皆因本來都計劃東奧結束後當住宅項目賣，唔搞東奧就可以提前推盤。無選手入住過的奧運村定位相當獨特，相信唔少海外買家，例如熱衷買日本樓的香港人都會頗有興趣，一炮清袋應該唔難。
奧運村不如早推盤
主場館出自名師手筆，可塑性就更強。既然中間有大草地可以感受陽光藍天，最好趁日本露營熱轉型為東京露營館。話說疫情期間日本露營熱大爆發，NHK日前就報道除了露營用品熱賣，豪華營地生意做唔切，更有日本人瞄準此商機，在鄉下地方以平價買山地作營地，可謂本少利大現金流穩定的好生意。以主場館的名氣，在中間大草地劃出多個露營位置提供日租服務，相信吸金力應該幾勁。
日本露營熱潮
至於東京有明國際會展中心，為應付東奧增建的臨時空間。識得用都仍然好好用，最就手用途係作為動漫遊戲活動場地，假如疫後解封，餓了這類活動已久的動漫迷，個個星期排長龍湧入場都唔厭。另一用途係作為東京最大共享工作間，既然JR新幹線、遊樂場都可以變身流動工作間，東奧場館開放予上班族流動工作應該會大受歡迎。假如會展中心變身共享工作間受落，其他場館都可以跟隊，並兼做社區中心，成為父母可以辦公、仔女可以做功課的好地方，總較丟空又拆咗佢來得環保兼符合成本效益。
相關報道：
