香港股市 將在 3 小時 18 分鐘 開市

【樓市贏家】三新界盤排隊開 邊個最伏?

論位置,山水盈伏味最濃。

雖然社會衝突仍未平息,但發展商已急不及待推售新盤,除了明日發售,收票情況一般的深水埗愛海頌之外,已有3個新界樓盤準備登場,如果手頭資金有限,買不到市區,這三個新界盤又如何選擇?

所講的三個項目,分別是掃管笏恆大.珺瓏灣,凹頭山水盈及青衣明翹匯,先講講發展商,三個在香港都算是發展商新丁,恆大雖然在內地是龍頭,但來港發展始終是第一次,到底最終交樓時是甚麼貨色,可能要等到收樓時才知道,另外兩個發展商路勁及佳明,雖然在港都有項目,但為數不多,好彩老闆都深明做大型樓盤跟過去的細項目不同,特別在一些大型發展商挖角,找來不少老手幫忙,質素方面可能有些少保障。

講地點,如果有追開筆者專欄都會知道,每次提到掃管笏這個地方,筆者都相當有保留,在一個無車人士的角度,要出入掃管笏真是有一點難度,再加上該區近年有大堆樓盤入伙,想迫巴士返工都未必有位上車。

不過,要講到地點差,可能山水盈比掃管笏更差,問心,筆者又真是無去過凹頭,真實交通情況其實不太了解,但筆者所知的是,項目所在的位置,正正有一條西鐵架空天橋穿過,無錯,條橋並不是在屋苑的隔離,而是在項目的頭頂!可以想像到的是有部分單位正正位於橋底或望正天橋,先不計風水問題,幾分鐘一班的西鐵,足以令你難以安寧。雖然明翹匯所在的地點都不是鐵路附近,但幾分鐘小巴就到青衣站,在這幾個項目來講,已經是地點最好的一個。

說到間隔,恆大.珺瓏灣地盤原本由恒地持有,初期發展都是由恒地負責,所以在戶型上都有恒地的影子,在近2000個單位之中,實用面積300多方呎的1房單位佔近半,開放式單位更由201呎起,可能會比較適合單身人士。

相反,山水盈雖然都有300呎單位,但比例其實好少,反而大部份都是近千呎單位,仲有廿幾間屋仔,最誇張一間屋花園面積達萬五呎,可能大家庭會比較合適。至於明翹匯,二百多呎到二千多呎都有,其中以兩三房為主,可以話係比較百搭。剩計條件,筆者有這樣的分析,有興趣當然可以做參考,但都要等開價才判斷。