【2021投資展望】比特幣爆升 兩大隱憂要留心

·4 分鐘文章
比特幣破-28-萬美元大關-兩大隱憂要留心
比特幣在2020年尾發力成為投資市場焦點。

近期比特幣爆升成為市場焦點,新手想追入比特幣,必須留心兩大隱憂。

再「翻兜」虛變實概念

比特幣狂潮再現,投資概念其實都係「翻兜」由虛變實。美國移動支付企業Square在今年十月斥五千萬美元掃入比特幣,網上支付巨頭PayPal亦公布,支援用戶購買、出售及持有比特幣。另外美國萬通保險亦斥資9846萬美元買入比特幣,令市場憧憬比特幣可望成為支付及網上投保服務的交易貨幣,由投機工具逐步變身為真正可以使用的貨幣。

另外機構投資者跟隊買亦助燃比特幣升勢,知名對沖基金經理Paul Tudor Jones 及Stanley Druckenmiller均出手掃入比特幣。根據區塊鏈分析公司Chainalysis數據,2020年九月至今,持有至少一千枚比特幣、加密貨幣錢包啟動不超過一年的投資者,累計已買入50萬枚比特幣,可見今次有不少具實力的大戶入場掃貨。

比特幣破-28-萬美元大關-兩大隱憂要留心
比特幣近期升勢強勁。

各國央行積極推動數碼貨幣,表面上官方版數碼貨幣登場會不利比特幣等加密貨幣,但不排除部分有產階級憂慮各國全面實施數碼貨幣,要跨國搬錢難度將大增,因此開始將資產分散至比特幣,進一步炒熱比特幣市場氣氛。

監管大棒來襲

一如2017年比特幣狂潮,當比特幣不斷破頂,市場上的目標價亦越來越誇張。現時較進取的目標價係50萬美元,加密貨幣貸款公司Celsius創辦人Alexi Mashinsky有此樂觀目標並唔出奇,不過女股神Cathie Wood亦認為比特幣未來上望50 萬美元,足以令唔少投資比特幣初哥「心雄」。

想加入投資比特幣的新手,須留心兩大隱憂。一是今次升勢有大戶當推手,看似會令市底更「實在」。但對沖基金、機構投資者這類大戶,強項就係搭起個棚做起個勢,時機成熟就狠狠拋售套現。這類戲碼在美股市場已不斷上演,要在加密貨幣市場重施故技就更就手。

另一隱憂係監管大棒來襲,當比特幣升唔停時,另一知名加密貨幣瑞波幣就出現大震倉。皆因發行商Ripple Labs被美國SEC控告違反證券法。近期歐美及中國監管機構已就規管科技巨企壟斷行為頻頻出招,假如針對FinTech監管加辣係全球大趨勢,估計加密貨幣可以獨善其身機會不大。只要一、兩個知名交易商或比特幣投資大戶被監管機構立案調查,比特幣就可能像瑞波幣般極速價崩。

監管隱憂亦增加香港投資者買比特幣的難度,年前本地著名加密貨幣交易平台Gatecoin被銀行凍結帳戶最終清盤收場,已令唔少本地散戶對投資比特幣有戒心。及後時富金融曾嘗試推出專為年輕投資者而設的加密貨幣交易平台Weever,但現時Weever已暫停服務,可見經營在本地經營加密貨幣平台並唔容易。

明白隱憂但又想搭順風車的散戶,可參考比特幣大好友、投資公司Galaxy Digital行政總裁Mike Novogratz的建議,調動個人資產2-3%出擊。想直接買比特幣,可以經全球最大加密貨幣交易所Binance入手,賣點係可以直接用信用卡扣數,原理好像海外網購般。想搵本地平台較熱門選擇係MyEthShop,開戶後可用轉數快、銀行過數或櫃員機入數,甚至預約上辦公室以現金存款。MyEthShop另一賣點係提供月供計劃,不過事先最好衡量承受風險能力。

擔心交易平台營運風險,亦可以考慮買比特幣概念基金,現時較受歡迎係Grayscale Bitcoin Trust(GBTC),基金持有市面上約2%比特幣。押注GBTC好處係唔使直接買比特幣,但付出代價係近期基金溢價升至34%,基金收費達2%。除了投資成本,比特幣出名大上大落,買GBTC亦要不時留意比特幣價格走勢,本身睇實美股港股已一頭煙的散戶,亦要衡量投資壓力成本。

伸延閱讀:

比特幣受惠股二選一:Square vs PayPal

比特幣會升至50萬美元?

【2021投資展望】美元一路插 移民國家邊隻貨幣穩升?

【2021投資展望】資金熱捧ESG主題 想投資有乜選擇?

【2021投資展望】如何贏盡拜登新政?