【流感局部停課】幼師自白:我仲慘過返工!
因為流感關係,政府上星期公佈幼稚園嘅局部停課名單,之後直接將個波完美咁交返俾幼稚園自行決定停唔停課。
可能一般打工仔覺得幼稚園老師又可以放假,好有著數,但其實好多幼師都好想同你講一句:「我仲慘過返工!」以下正係你未必睇得清嘅真相:
星期六日狂接家長電話:無錯,幼師剛剛過去呢兩日所接到家長嘅電話,絕對已經達到上一年嘅總和,因為家長會問「點解學校仲未公佈情報」、「幾時公佈」、「如果你唔公佈停課、我可唔可以自己唔俾仔女返」、「如果出事係咪學校負責」等等,所以呢兩日幼師緊係開行晒Turbo照顧一班米飯班主啦。
提早預備一至兩星期功課:停課唔代表唔使做,因幼稚園家長係要打電話追老師派功課,以確保自己仔女跟到學習進度。所以幼師呢兩日都趕住出工作紙俾學生,塞住家長班口。
不斷開會:為咗同幼稚園辦學團體、管理層更新停課安排,所以幼師將會全天候stand by開會,開到正式復課為止。
所以話,學生唔煩、背後班家長先至煩,今期「陰工」仲唔係幼稚園老師?!
===================
19網輕鬆爆料熱線,歡迎舉報老細同事19惡行,立即click入去講畀我哋知啦