港銀將出現減分行潮?
滙豐忽然慷慨取消存戶最低結餘收費,市場普遍解讀為應對虛擬銀行來襲而預先出招。當你滿心期待有更多港銀加入免收結餘費行列,或許要擔心隨之而來的問題,港銀或會出現減分行潮。
虛擬銀行最大優勢係沒有租金負擔,可以有更多子彈提供高息及免收費優惠。此外,因著港銀難以加存款息,所以早著先機的滙豐就拋出取消存戶最低結餘費招數來留客及吸客。港銀另一難題係按息難加,如果為留住存戶資金而取消各類收費或增加優惠,這盤生意就會更難做,特別係對中小型港銀而言,經營成本更是百上加斤。
經過東亞的示範,四筆共62億元內地貸款可以蒸發25至30億元,當內地貸款爛尾消息多到滿瀉,甚至有分析指內地中小型銀行最急須當局幫手應付爛數風險時,就更令人擔心會有港銀步東亞後塵需要為內地貸款減值甚至撇帳。
港銀難撈風險升溫,應對方案離不開開源節流,縮減分行就係最直接的方法。
純粹大膽預測,既然銀行大力鼓勵存戶用網上銀行及ATM,縮分行就可以「財仔」般,改租超蚊型分行,只設ATM、打簿機、幾部電腦及兩個會客室,由職員駐場指導年長客戶使用ATM 或網上銀行過數、交費及打簿,至於會客室就用來sell理財產品、按揭等有利可圖生意。
嫌蚊型分行形象太小家,中小型港銀亦可以考慮合租大舖方案。既然百貨公司專售化妝品樓層都可以容納多個名牌專櫃一齊做生意,套用此概念,港銀合租大舖,亦可以劃分二至三個品牌專區,只要指示清楚,客戶就自然懂得排隊。這方案還有兩個好處,一是集中人流谷旺個場,杜絕出現整間分行冷清情況;二是讓前線員工同場感受行家服務的威脅,由危機感觸發鬥心,或有助提升業績呢。
(設計圖片:《集團左遷》劇照)
===============
精選資訊網站「中環街市」 臉書粉絲頁