滙控與其遷冊 倒不如分拆自己

.

滙控DQ派息決定觸發股東要求由英國遷冊回港，避過三不五時收罰金又要求多多的歐洲監管制度。但滙控掌舵人只係簡單回應一句無研究就算，咁搞法滙控分分鐘上演沒完沒了的股東維權戰。要平息風波又唔想遷冊，有無其他選擇?

代入滙控掌舵人角色，當然唔太想遷冊回港。皆因啟動遷冊就失去英倫銀行地位，變回亞洲銀行。更大問題係落實遷冊，總部將不能避免搬回又濕又熱的香港，而半山大班屋又一早賣走，要適應新工作及居住環境都幾難捱。而且掌舵人隔個海回看亞洲，亦可能覺問題不會比歐洲少，倒不如一動不如一靜。

唔搬又要安撫股東，另一可行方案係滙控分拆自己到香港上市。這條絕對係舊橋，電能變身做國際能源股後，都分拆港燈照顧小股東收息需要。電盈分拆出來的香港電訊，亦成為受散戶追捧的收息股。至於銀行股中，定位為本地銀行股的恆生及中銀香港，在股民心目中都有相當份量，所以滙控照抄舊橋，分拆滙豐香港在香港上市，並以九倉系派股方式，讓滙控股東即時可獲派滙豐香港股份。這一招既有機會透過分拆釋放滙控潛在價值催谷股價，滙控股東為了獲分滙豐香港股份，更可能會積極低吸滙控股價，即使繼續唔派息唔回購，滙控股價都可能重拾上升動力。

.

成功分拆後，以滙控香港賺錢本事，穩定派息將不成問題。至於滙控就可能繼續做其歐美銀行，並利用滙豐香港派息拓展國際業務。內地巨企基於息率回報及戰略價值，亦可能棄滙控改買滙豐香港，這樣日後照顧內地機構投資者及本地小股東責任就落在滙豐香港阿頭之上，滙控掌舵人亦樂得耳根清靜，日後搵人接手更可能容易得多了。

到時滙豐香港呢邊獨立派息，老一輩的長情滙控股民，就不用再phone in財經節目，問主持人歐洲唔派息「咁香港呢邊有冇得派」了。

===============

精選資訊網站「中環街市」 臉書粉絲頁