雅虎香港財經 
大灣區概念股會去晒橫琴？
舊年十月曾有消息指澳洲計劃成立交易所，此大計終於有突破性發展。國家發改委表示研究探索在橫琴建設澳門證券交易所，以支持澳門發展符合自身實際的特色金融產業。
這邊廂香港擴大中港互聯互通機制，這時候澳交所由消息蛻變為積極研究項目，令人有興趣想知澳交所嘅定位。參考舊年10月消息，澳門證交所定位係「人民幣市場的納斯達克」，而發改委又提到澳交所係支持澳門發展符合自身實際的特色金融產業，再加上澳交所落腳點係珠海橫琴。三項因素夾埋來睇，有三大類股份有機會選擇在澳交所集資上市。
三類股份可在澳交所集資
第一類係創科股份，既然定位係納斯達克，自然係以創科企業做膽。首階段可能係安排中、小型創科企業在澳交所上市，至於大型企業仍然會在香港上市，但同時會安排小部份新股在澳交所集資上市，類似原先螞蟻上市部署。試想像星級創科股同時在上海、香港同澳門上市，單係聲勢都唔嘢少。在澳交所上市，理論上可以更容易吸引外資，亦符合中國開放外資投資嘅大方略。
第二類係澳門概念股，話晒都係掛著澳門牌頭，濠賭股當然要轉戰澳交所才名正言順。在香港上市的濠賭股，大可以在澳交所作第二上市，方便澳門市民成為股東，再集資亦有助濠賭股在疫後重新出發。另外澳門係娛樂休閒之都，日後娛樂事業、旅遊及渡假類股份，亦可以優先考慮在澳交所上市。例如電影製作公司、演唱會製作公司、航空或酒店企業都切合澳門定位。如果航空業後起之秀大灣區航空選擇在澳交所集資上市，就更有標誌性。
第三類係大灣區概念股，粵港澳大灣區倡議機遇處處，相關概念股在橫琴澳交所上市，就更富意思。本地地產股、物流股、航運、物管、金融，均可以分拆大灣區業務在澳交所上市，配合火速落實港澳互聯互通機制，可能本地散戶炒澳交所股票較港股更投入，到時一眾財演就可能要畀心機鑽研澳交所股份，以應符散戶的關注點了。
照睇上述三大類別應可與香港互補互通，如果發展順利，加上澳門明年又繼續派錢，好難怪正愁於于文鳳案的「星爺」周星馳都不忙講一句：「好想飛、最想去澳門」了。
===============
精選資訊網站「中環街市」 臉書粉絲頁
