無叉用是大趨勢

.

繼早前有傳新iPhone不再送叉電器後，韓國媒體亦報道三星正考慮將來手機產品執走叉電器。假如兩大龍頭都出手，意味我們將迎接無叉用電子產品新時代。

「老馮」送叉電器多年，點解忽然吹風話執走這款例牌配件？講到尾原因都係錢，今年手機開始由4G轉到5G，配件成本貴咗，但偏偏環球經濟唔多掂大家都緊縮荷包，廠商不單無乜條件再玩大幅加價，甚至要多推中價機保住銷量。如此形勢下，最好將一啲非必要配件執走節省成本維持毛利，於是叉電器成為開刀對象。

點解叉電器已淪為非必要配件？隨著無線叉電技術普及，用家另外買一個無線充電器，即使換新機都懶得開原廠叉電器來用。而且以往大家習慣一年換一次機，幾年累積屋企叉電器根本不缺。另外自攜一條USB線，亦可以利用電腦、配置USB插的插頭及拖板為手機叉電，既然係咁，原廠叉電器難免顯得多餘。

有傳新iPhone不再送叉電器

除了叉電，另一盛傳被開刀係原廠耳機，假如新手機同時執走這兩款配件，可以想像將來新手機包裝可以大瘦身，廠商又節省大筆包裝及運送成本。按現時用家少用原廠叉電器及耳機的習慣，可以大膽預計消費者應唔太抗拒執走配件策略，難怪近來蘋果股價一直維持強勢，似乎投資者押注5G iPhone可以熱賣兼且執走非必要配件可以賺更多。值得留意係小米日後會否追隨此做法，一旦成事，對小米手機毛利及股價都係一枝強心針。

至於用家，考慮到原廠叉電器將會「消失」，最好先留定一個原廠叉電器作備用。而平日用手提電腦工作的朋友，更大的憂慮係廠商下一步會否執走手提電腦的叉電器，假如成事，換機時賣舊機就要扣起原廠叉電自用，價錢又可能要下調，確實係一個兩難局面了。

===============

精選資訊網站「中環街市」 臉書粉絲頁