無美國貨的日子怎麼過
中美角力又升溫,今次風向係把辣稅措施實施在香港市場,一旦成事,意味我們將面對沒有美國貨的日子,不過只要肯變通,要適應其實唔難。
忽然要捱辣稅先買到美國貨,聽起來似乎好震撼,不過正所謂太陽照常升起,要適應新常態,第一步係諗一諗平日自己在衣、食、住、行四大範疇會買幾多美國貨?先講衣,幾個美國大牌子雖然在購物旺區均佔據當眼靚舖,但唔少人都係睇多買少,願意入手反而係剪裁款式較適合東方人身型的日系、韓系出品。
至於食,固然美國有唔少食品品牌深入民心,但香腸、汽水、沙律醬、粟米片等食品,要找其他國家代替品其實輕而易舉。特別係兩大食品產地歐洲及南美均借機大舉進軍中國市場,有這兩大產地支持,超市貨架即使放棄美國貨,消費者仍不愁沒有選擇。不過對無牛不歡的消費者來講,日後要品味美國安格斯牛就可能要付更高成本,但亦可以借此機會,改試澳洲、南美或日韓出品,再用美式煮法,或許會因此擴闊自己的品味領域。
住方面,香港家電多年來由日本稱霸,近年亦多了消費者選擇中國或韓國出品,美國家電一直係另類選擇所以影響有限。至於裝修物料,地板、地磚、牆紙唔少消費者都鍾情歐洲出品,中、高檔家具則偏好日本及歐洲出品,美國貨同樣唔係主流。較大影響可能係清潔消毒產品,不過因應疫情,本地唔少大牌子已力推同類產品,無得買美國貨未改為支持本地產品亦無不可。
行方面心理壓力就更細,美國車在香港從來唔係主流,即使近年掀起大大部SUV熱潮,買家都只會優先考慮日本或歐洲出品。
至於另一樣隨行工具手機,暫時蘋果iPhone仍未受到辣稅影響,即使iPhone被加入辣稅清單中,大不了就兩年先換一次機兼買新機唔「攻頂」,甚至索性轉會到Android改用韓國機。
從衣、食、住、行四方面睇,生活中無美國貨問題唔大,更何況只要繼續有得開戶炒美股,大家真金白銀做美國企業股東,足可以彌補少買美國貨的消費遺憾有餘了。
之不過,中美大戰最大問題係會否進一步影響聯匯同物品價格,仲有轉口貿易的影響,從而引發社會動蕩,樓價大跌…但如果連美國貨都拒絕不了,香港人就很難對美國說「不」了。
===============
精選資訊網站「中環街市」 臉書粉絲頁