煲《反黑路人甲》 譚詠麟點讚王浩信
「樂壇校長」譚詠麟提攜後輩不遺餘力,繼早前點名大讚歌手衛蘭,讚佢首新歌《分手的第二天》「旋律好輕快,清新易上口」,點知原來校長認錯人,個歌手其實係衛詩先啱!
不過唔緊要,譚校長近期轉戰煲劇,仲愛上咗無綫黃金檔播出、演員王浩信、高海寧主演嘅《反黑路人甲》。佢喺社交網上載咗收看時拍下嘅電視機熒光幕圖片,點名大讚王浩信,佢話:「一連兩日看了無線(綫)新劇:反黑路人甲 覺得不錯。整個風格似漫畫拍攝手法,人物多而不亂各人性格鮮明且故事入戲快編劇組應記一功。」仲讚主角王浩信有周星馳嘅影子。網民表示王浩信能獲譚校長加持,相信佢喺娛樂圈打滾多年嘅付出冇白費!王浩信見到校長公開點讚,都立即喺自己社交網發文表示:「嘩!多謝校長鐘(鍾)意睇反黑路人甲❤️」