【熱話】中環文職轉做殯儀好嗎？

人向錢看，有月賺15K的28歲中環文職心思思想轉行做殯儀，貪殯儀行業人工高，閒閒哋都賺30K，但怕轉變太大，於是走上討論區搵人指點迷津。

呢個想法贏得部分網民支持。有人話殯儀行業長做長有，值得入行。入行門檻亦唔高，可去報讀殯儀師，全套學哂，自然會有人獵頭；有行內人就教路，試工期只得三日，如果你過到頭三日先至會請你；仲有行內人話，如果識揀，摸吓條路點做喃嘸佬，分分鐘一單袋50K。

不過亦有唔少人大潑冷水，叫樓主搵日實地視察吓，聞一吓菊花，燒香，同先人化妝後嘅味道，仲有棺材味再作決定，同埋頂得順啲親戚朋友滿面悲傷，甚至哭哭啼啼，先好入行。

此外，殯儀業會請人嘅都係行街sales、墳場管理等，真係入行基本上要人帶，如果打工仔冇人脈，根本入唔到行。雖則話呢一行缺人，實則自己人玩番。一張白紙想入行？除非你有好多死人單益你師父或老細，否則都難做。

但講到尾，有志者事竟成，聽朋友講，真係有人為咗入行，特登去殯儀館做看更識人。所以……事在人為啦！

來源：香討

【相關搜尋】殯儀館和靈堂的10大禁忌

===================

19網輕鬆爆料熱線，歡迎舉報老細同事19惡行，立即click入去講畀我哋知啦