雅虎香港財經 
【熱話】冇炒家推冧個市 都係炒樓最穩陣？
話說今日有細價股投資者，見報呻冤話俾國際金融大鱷「360HK」呃錢，呃佢要不斷補倉。但散戶睇完單新聞後，好明顯唔多同情，仲話呢啲手法，其實只係以前班炒家用來焗散戶上船嘅老土招，只係大有大食、細有細食。
開離岸空殼公司做「貸款人」、假網站、一出事就辦公室人去樓空等等，係唔係新招，認真見仁見智，大家自己識睇，筆者反而想引述其中一位散戶回應，佢話股市凶險，都係樓市安全，仲話：「都係買磚頭安全啲，冇炒家推冧個市」。
原文如下：
「83年用27萬5購入第一個連車位單位，現時升值40倍，98年用8萬多元買租置，現在……嘻嘻！
06年用128萬購入第三個單位，現在升值7倍，哈哈！」
近年朋友之間，流行講一個叫心臟病指數，就係搵錢以外，個投資項目，會唔會令你心臟有事。睇返近年樓市走勢，無論係CCL抑或CCI，依該位散戶思路，的確係「買磚頭安全啲」，今時今日炒樓，無咁易有心臟病，尤其係一把年紀，身體唔好，人自然慢慢迷信「磚頭」，講起來都有啲生理原因。
（中原CCL）
近年又的確係少咗人講「我要等03年再現時入市」嘅觀點，眼下多數係業主持貨自住或仔女住，如果真係有炒家想「推冧個市」，估計結果都只係兩敗俱傷，你覺得，炒家會唔會咁做？
反而，炒股真係炒到心臟病，尤其見到中伏股、清盤股，同埋騰訊兩嘢就穿，個心真係離一離。
筆者朋友結論係：「炒樓唔使煩。」唔知你又同唔同意呢？
（大家都忘記了，當年都有人炒樓炒到差啲跳樓，或者只係大家都寧願賭一舖，all-in樓市唔再爆煲。）
===============
財經精選資訊網站「中環街市」 臉書粉絲頁
