【熱話】報館請專題記者
一間報館請人,竟然成為網絡熱話。
話說尋日記者協會上載咗一則招聘資訊,就係有報館請偵查專題組資深記者同記者。大家都知今日今日,記者、警員幾乎並列兩大最難做職業,所以招聘一出就引來熱話。
份工要求大學畢業、中英文良好,對新聞工作有熱誠,同埋最緊要當然係有經驗優先。
但有唔少花生友就話要加多幾項條件,有人話要加個「良心」,有人就話要不畏「黑勢力」,有人就話,不如講明咩立場可以優先。
有支持記者工作嘅網民就話,感謝記者守護真相,話記者份工唔易做,又要食催淚彈又要俾人鬧,但有人就質疑,記者係咪要識看圖作文,如果條件係「良心」,可以點樣證實云云。
不過睇開「扮工」都知道,小編關心各行各業人工多啲。唔理個招聘幾多條件,問題係到底有幾多人工?
新入職記者低薪向來都係行內熱話,甚至有前總編,會覺得「月薪九千至一萬」係「不計付出的年輕人」,仲話「聽了很感動」。
今日大多數都過一萬嘅,普遍都高咗少少,但其實有學歷、有良好語文能力,又肯日曬雨淋捱更抵夜,做其他行業,應該唔只呢個數,只可惜現實,理想同麵包,真係唔可以並存呀。
來源:記協fb
===================
19網輕鬆爆料熱線,歡迎舉報老細同事19惡行,立即click入去講畀我哋知啦