【熱話】眼鏡佬悲歌 踢爆四大惡啃位

每一行都有本難唸的經，今次主角落咗喺眼鏡佬身上。

所謂嘅眼鏡佬並唔係指視光師，而係賣眼鏡嘅sales。有行內人聲稱喺一間知名嘅眼鏡舖做咗5年眼鏡佬，因為眼鏡佬係世上最難做嘅sales之一，所以一直都想轉行，不過因為上晒手，變得冇乜動力。

之但係，近來佢終於頂唔順，數盡四大死啃位。

第一，香港人對眼鏡既要求高到離晒譜： 例如間中會有人投訴鏡片花，一check 先知原來配咗3年。跟住個客就會同你講，佢上次眼鏡配咗10年都冇花，你呢個用3年就開始花，一定係你地啲鏡既品質有問題，仲話要去消委會告人。 又例如啲人成日要眼鏡輕，輕到好似冇戴咁，但係又唔知自己度數深，死都要揀啲圓框，講明好重都係要配。最後做完出黎又話重又話戴到頭痛，仲要賴你點解之前唔阻止。

第二，眼鏡鬆緊，度數啱唔啱，呢啲除咗戴果個知之外，其他人係冇辦法知道。但有客人就拎呢樣嘢來攞著數。就好似有個客配眼鏡果陣有A同B眼鏡，2揀1，最後個客揀咗A，但3日後佢打黎話佢想轉B眼鏡，而鏡片已經車緊所以冇得轉，因為落咗刀嘅鏡形狀只能配A鏡框。賤招來喇，就喺呢位人兄拎眼鏡時，點幫佢校佢都係話鬆，又話度數唔啱好暈，擺明就係想乘機換鏡啦！眼鏡佬都只可以無奈接受。

第三，眼鏡佬雖然只係一個sales，但實質工作其實係輔助性醫療，卻要求你有專業知識，係人工絕對唔應該包嘅專業知識，包括唔同款既鏡框、鏡片、鏡片功能(有過百種鏡片同鏡框你要知仲要不斷update)，連眼疾、眼睛構造、度數加減呢啲視光師知識都要識，因為客人會問你，你唔識佢會就即刻走人。

第四，零晉升機會： 一日眼鏡佬，一世眼鏡佬，唔好諗住可以好似幾十年前學師做視光師，因為香港視光師有發牌制，一定要在大學神科畢業先得。除非轉行，否則你一世都只係一個搵萬幾蚊嘅眼鏡佬，真係夠晒灰。

來源：香討

===================

19網輕鬆爆料熱線，歡迎舉報老細同事19惡行，立即click入去講畀我哋知啦