【熱話】Starbucks$70請新年短工
Starbucks呢個招聘廣告最近引來網呢熱論,因為講緊請大量新年合約短期員工,返工日期係1月28日至2月11日,即係橫跨整個農曆新年,一星期至少返4日,每次至少4個鐘。而時薪講緊係$60-70。此廣告一出,立即有大批網民留言。
唔少人都覺得,呢份工做爛市,因為新年返工最高得70蚊,連新年最基本嘅雙工都無,請黑工都唔做啦!亦有網民嘲笑,Starbucks用呢個人工請人,不如響應特首,請啲65-70歲嘅「中年」男女新年賣咖啡,提升中年就業率。
不過講到香港打工仔嘅核心價值,都係相信將貨就價,公司出幾多人工請人,打工仔咪因住個人工,俾返相應嘅工作態度同質素囉!
唔怪之得有心水清嘅網民已經一語中的,講到「即係新年唔好幫襯Starbucks喇,因為一班人工低嘅新手沖咖啡俾你飲呀,點會飲得入口呀?」
小編覺得,除非新年完全無利是逗,如果唔係,逗利是「時薪」隨時高過返Starbucks啦~~
===================
19網輕鬆爆料熱線,歡迎舉報老細同事19惡行,立即click入去講畀我哋知啦