爆一爆｜細劉啟德 Sogo 開張延期 商戶： Delay No More（Louise）

同老友飯聚，佢人到中年，照計有份中高層好工，又冇仔女，自住層樓又一早供滿，財務應該好自由吧。見老友鬱鬱不歡，原來早幾年前摸頂喺啟德呢個大眾「英雄塚」 買咗件納米樓投資，即使供得起都好影響心情。

下載Yahoo財經APP

美股外幣即時報價 多國新聞任睇

利福73.88億豪買啟德地

其實瀬咗嘢又豈止一般嘅蟻民，大孖沙一樣踩咗落啟德呢個泥沼度，大細劉 -劉鑾雄及劉鑾鴻昆仲過往係地產及股壇都見慣風浪，佢哋揸住利福國際 （2022年已私有化）即係 Sogo 嘅母公司，2016年咪又係摸頂用$73.88億投咗啟德塊商業地，地價$6733一呎，當時好威水，破咗全港最貴商業官地嘅記錄。家陣咪建成啟德嘅雙子塔，差不多已經落成。

本來話9月15日係雙子塔嘅Sogo會開張，大肆搞 party 連嘉賓名單都準備好哂，但商戶突然獲通知，9月15日開唔到，好似話幢建築物有啲批文未搞掂，所以要延遲到11月15日。 Sogo入邊嘅商戶當然「媽媽有聲」，因為做唔到中秋節一輪生意，亦都冇埋黃金周，最慘係有啲貨唔賣就會out咗，而責貨責多兩個月對商戶資金流來講係好大壓力，謂：「賣唔到貨係會死㗎！」

利幅國際2016年用$73.88億投咗啟德塊商業地，地價$6733一呎。

雙子塔不能拆售

雖然 Sogo 都大慈大悲，津貼番啲商戶嘅裝修費，但係一開閘就脫腳就認真唔老嚟。事實上，Sogo 啟德呢家旗艦店，雖有不少名店，但 Chanel 對面行200步就喺公屋啟晴邨，而 Dior 就係正警署對面，成件事頗有「新香港」味道，同屋邨入面嘅「日本城 」、「AEON」又點比較好呢？睇嚟呢兩幢雙子塔，細劉要慢慢揼石仔先掂，事關賣地條款講明不能拆售的，將來如果想甩手，除非搵到個好似昔日恒大許家印咁豪爽嘅濶佬接貨先得。

當下零售業如此爛市，最有幸福感嘅要數利福國際嘅小股東，未通關前大股東細劉提出私有化，每股$5，等大家可以套現甩身。如果唔係揸到家陣，可能五毫子都冇，所以都要向細劉來個感謝祭。期待Sogo 11月15日開張，Delay No More。