【理財實戰】值得趁年尾出手的錢銀部署

臨近聖誕新年假期攤抖氣氛濃厚，不過理財無得偷懶，特別係把握年尾時機，不妨出手做兩類錢銀部署。

翻身貨幣順風車

今年年尾特別之處係國際級大事件特別多，今個星期就有保守黨在大選贏得過半數席位及特朗普放風將與中國達成大刁。兩項消息固然利好香港股市，亦令深受港人歡迎的人仔及英鎊大翻身。

英鎊及人仔受制於脫歐及貿易戰積弱多時，現在保守黨勝出大選，約翰遜有民意支持可以加快啟動脫歐，同時兌現其催谷經濟承諾，預計可以刺激英鎊轉強一段時間。至於人仔，首階段貿易協議將拍板，美國辣稅威脅暫時消除大半，加上中國持續出招穩經濟，人仔可望在短期維持強勢。

當然中、長期英國及中國經濟狀況尚有不少變數，所以想搭英鎊及人仔翻身順風車，穩陣之選係短期定存。先講人仔，以短存一個月為例，手持五萬港元又係滙豐運籌理財客戶，就可以賺3.8厘息。至於英鎊，具行動力可以玩7日短存，例如中銀綜合理財服務客戶押注五萬港元人仔一星期短存，就可以賺5.8厘息，若然順便賺埋價，都算係一份給自己不錯的新年禮物。

儲錢唔使等年頭

唔少人都會計劃等待每年第一個月份才啟動儲蓄，其實決心儲錢，在年尾提前展開可能更佳。首先係通常聖誕新年放完假，之前諗定的計劃又無件事，於是儲錢大計又繼續拖，倒不如趁放假前提前啟動。其次係現在經濟吹淡風，諗儲錢難免先要考慮自己份工有幾穩陣。唔少大公司的經營狀況，在12月從獎金額度、加薪及人手增減風聲已可以探知，如果衡量過份工暫時算穩陣，又多了筆獎金幫補，都可以趁年尾率先啟動儲蓄大計。

想簡單又穩陣可考慮零存整付計劃，擔心收入到明年中可能縮水，可以選擇供款期較短的計劃，例如先供半年；又或選擇一些提款限制較靈活的計劃，例如大眾銀行（香港）的「易儲錢」計劃，雖然存款期最少12個月，但儲滿三個月就可以提取本金及利息，方便忽然要應付周轉需要。

至於月供港股，香港經濟持續疲弱，你或會憂慮越供越跌。不過跌市周期月供股票，其實可以趁機儲更多股票，對日後賺價賺息都有利。此外不少防守型股份如收租、交通、本地金融股已累積相當跌幅，想提早押注經濟復甦，現正是利用月供股票收集的好時機。當然投資抉擇必須考慮逃生門，所以最好揀一些免除調整或中止月供股票的計劃，減少跳船成本。