【理財實戰】揀高息股謹記要「向前看」

滙控宣布取消派發2019年第四次股息震撼全城散戶，亦揭示港股高息股名單勢將大洗牌。散戶唔想一再中伏，就要謹記向前看。

以前有依家未必有

經歷漫長的低息周期，令高息股成為廣大散戶的恩物，特別係收益率高、派息又穩定的大藍籌，即使股價一挫再挫，仍可以吸引散戶撈完又撈，滙控正係好例子，因為過去幾年具備一年派四次息兼回購股份賣點，結果由八十元到六十、五十元等關口都有散戶出手低吸，結果滙控坐艇苦主大軍不斷壯大。

現時港股大平賣，散戶面對低吸高息股誘惑，須謹記兩大重點。一是收益率係按過去派息紀錄計算，股價低殘亦是推高收益率的重要動力。因此揀高息股，應留意目標股份公布業績消息，確定宣告派息固然較穩陣，但滙控動作就提醒我們，公布了派息仍有變數，事實上除了滙控，去年中滔環保在兩度延遲派發中期息後，最終公布撤回派發中期息建議。

因應派息建議或會無下文風險，揀高息股我們除了睇業績，更要留心股份所屬行業及地區情況。例如在歐美同步掛牌的大型保險股，與滙控一樣面對減派息壓力，加上香港市場保單縮水，或會順水推舟取消派息保留現金。另一高息股熱門之選內房股，雖然不少近期陸續公布業績內房股仍可以維持派息，不過內房龍頭之一恆大已揚言未來首要目標係大幅減債，假如這成為內房共同目標，今年有的派息明年或會大縮水甚至消失。

還有一類高息股是靠特別息推高收益率，特別是一些家族控制的老牌工業股或收租股，很多時在成功出售資產後都會派發超高特別息回饋股東，近期代表例子有中華汽車公布豪派19元特別息，派息財源來自之前完成出售英皇道625號物業50%權益。當然大家都會明白上市公司豪派特別息可一未必可再，但亦會有散戶進取地認為環球投資市場震盪，大股東為增加手頭現金兼穩住股價，可能會選擇繼續豪派特別息。不過回顧過去大跌市，部分家族或會任由股價跌至低殘再策動私有化，如果你為了特別息揀中這類股份就可能無法翻本。

適度調整期望

外圍市場摸唔透，聚焦本地市場揀高息股又如何?現在本地經濟元氣大傷，持有甲級商廈收租股及交通股價值都需要重新估計，較值搏還是無得慳的民生消費股。公用股兩電一煤雖然減派息減紅股，但勝在可以較放心持有，不過就要調整一下未來派息期望管理。

另外假如中港市場有一段長時間要過緊日子，亦利好平價飲品股及即食麵股，難怪唔少散戶寧願減持本地快餐股，改為增持龍頭即食麵股日清食品了。