【理財思考】買完醫保係咪要再買保險股？

經濟唔好大家更擔心突發事故令儲備一舖清袋，因此標榜入場費經濟的自願醫保投保人數一直穩步上升。咁想對沖醫保成本，入手保險股係咪一個有效方法？

投保要勇於格價+轉會

自願醫保與MPF同樣由政府大力推動，但兩者最大分別係一個自願一個強制，所以即使政府大力宣傳，投保反應都可以很冷淡。不過按食衞局公布數據，自願醫保推出頭六個月已保單數目已衝破30萬，其中約一半受保人為40歲以下。半年有此成績，反映自願醫保其實叫座力不俗。

至於自願醫保應該點揀，綜合消委會調查及食衞局的數據，可以歸納出四大要點。第一係上網格價，自願醫保優勢之一係有官方格價平台，只要到自願醫保官網「搜尋認可產品」，輸入簡單資料，系統就會列出標準計劃或靈活計劃清單，方便你了解保費的差距。所以揀自願醫保第一步唔係搵你做緊保險的朋友，而係先自己格價。

第二忌盲目貪平，按食衞局數據，原來有九成六投保人會選擇靈活計劃，反映消費者智慧係買就買好少少，總好過有需要時才發現標準計劃原來好多嘢都唔包。第三係留心附加項目，如果你都跟大隊買靈活計劃，就要留意計劃列明的自付費（墊底費）銀碼，又或是否有一些吸引附加保障如涵蓋住半私家病房使費。第四係勇於使用轉會權，醫療保險係每年續保，假如發現之前買的自願醫保唔太對路，身體健康狀況良好，就可以策動轉會。不過由於轉會涉及重新核保手續，所以最好預先check清楚你現有保單到期月份，以便提早揀定新計劃轉會。

「中國概念」或帶來攤薄效應

入手醫保後意味又多了一筆保費開支，你或會諗可否像買電力股對沖電費般，入手保險股幫補保費開支。要達成幫補保費目標，回報當然不能太削。單睇賺息，最受本地散戶歡迎的友邦，收益率1.44%跑輸同業。至於另一隻巨頭宏利金融，收益率3.23%雖然跑贏同業，不過近年派息比率就略為縮水。

至於賺價，友邦及宏利無疑過去都有相當爆升力，但未來潛藏「中國概念」隱憂。中美首階段貿易協議重頭戲之一係中國開放金融市場，取消包括保險行業在內外資持股比例限制。德國安聯獨資營運的安聯（中國）保險控股日前已於上海開業，顯示外資保險商有更大空間搶攻內地市場。按理友邦及宏利都會係「中國概念」受惠者，但因著外資對手增加，要維持高毛利率就有難度。所以貿易協議公布後，友邦股價反而受壓。

如睇好熱錢繼續湧入美股市場，亦可以考慮入手美股保險股。偏好市場強者可選擇聯合健康集團（UnitedHealth Group-UNH)，UNH厲害之處係結合健康保險及透過Optum經營的醫療服務，可以提供醫保加醫療支援一條龍服務，Optum另一強項係健康數據分析，因此亦被譽為醫療界的亞瑪遜。UNH股價波幅亦媲美亞瑪遜，過去一年曾低見220美元，但近期受業績刺激又衝上300美元大關，而股息率亦有4.32%，切合想賺息又賺價朋友胃口。

假如你求穩陣又係股神fans，亦可以嘗試跟股神隊買Globe Life（GL)。股神旗艦巴郡現時持有5.87% Globe Life股權，Globe Life經營人壽及健康保險業務，股息率雖然只有0.69%，但勝在派息穩定，雖然股價近期已突破一百美元大關，但亦有分析指股價有力再衝上120美元。

美國保險股暫時最大隱憂係民主黨重掌白宮，皆因有民主黨總統候選人力撐全民醫保，投資者憂慮此政策會衝擊保險業盈利能力。不過此主張連其他民主黨總統候選人都炮轟，而特朗普挾貿易協議增加連任勝算亦可以沖淡此隱憂，睇好美國保險股朋友，不妨以逐月分段吸納方式平衡風險。