【理財熱話】做善事要識得揀更要識得「割」

聽人講不如自己做功課

大家忽然發現原來Cut捐款唔容易，起因應該係近年成為主流的街頭募捐大使方式。募捐大使通常拿著iPad或大快勞，在街頭截停你介紹慈善機構的工作，當你被打動時，便會建議你透過信用卡申請每月捐款。這類募捐大使有佣分已是公開秘密，所以即使機構有一筆過捐款選項，他們都會極力鼓勵你選擇月捐。但選擇長期支持某間慈善機構工作其實係一項嚴肅抉擇，按理不應在街頭草率決定，所以最好都係禮貌地婉拒，花一點時間做功課了解一下這項「投資」的性價比。

無疑你係真金白銀支持某間機構，這筆錢都算係人生投資之一，所以態度應該像投資股票般先了解一下機構的基本因素。第一步係檢視機構的工作及服務範圍，是否切合你關注的課題。第二步係望一望機構盤數，途徑係在機構官網查閱財報或到明施慎選瀏覽機構評級資料，最重要係睇行政開支比率，比率較高的話，意味你的捐款會被行政開支蠶食一截。第三步係八卦一下近年機構的新聞，如果不斷出現醜聞，例如高層濫權或職員在服務地區行為不檢等，你便要認真考慮這間機構是否值得支持。

至於應否選擇月捐，其實慈善機構大都提供月捐及一筆過捐款選項，擔心來年自己份工唔太穩陣，倒不如以用支票、繳費靈或網上過數等方式一筆過捐款。如果你累積唔少信用卡積分，亦可以考慮用積分兌換為捐款，支持心儀的慈善機構。

「割」到盡要靠攬炒

假如不幸地發現之前選擇月捐的慈善機構，由行政成本到機構處事作風都唔對路，這時候唯有選擇Cut捐款。如果你當初選擇以自動轉賬方式捐款，方法就較簡單，部分銀行直接打客服熱線，或到分行及登入網上銀行辦理取消就搞掂。亦有銀行要求填寫表格再郵寄到匯款部申請，並會扣除30元手續費。

至於透過信用卡扣數就較麻煩，捐款人需要向相關機構提出取消授權，換言之你要主動聯絡受助機構Cut捐款。假如你支持的機構出現Cut捐款潮，你有可能遇到熱線打不通，電郵、Fax不獲回覆的困境。沒有辦法之下還可以選擇攬炒方式，你可以向發卡銀行表示無法聯絡受助機構，或嘗試過聯絡未獲回覆，銀行遇到這類情況會幫你換張新信用卡，由於新卡號碼已改，之前的月捐指示便會無效。但此方法痛點係你要聯絡所有以信用卡扣數的商戶如電訊商、公用機構，申請更新轉賬資料，唯有當自己買過教訓，日後要加倍留神帶眼識機構吧。