【理財解難】如何應對「盈轉虧」風險？

近來本地企業公布業績，「盈轉虧」係熱門關鍵字之一。作為打工仔，面對「盈轉虧」風險升溫應如何自保？

計算真實身家

當經濟衰退來襲，其中最難捱一關係收入縮水但負債繼續滾存。為未雨稠繆，應對「盈轉虧」風險重要一步係計算一下自己真實身家。

所謂真實身家，並非單睇自己現金加股票的總值，而係將個人資產減去負債，從而得出真實的身家。如果係負數，當然係一個危險訊號，不過危險度都分輕重。較輕的係負債源於學生貸款、稅貸等低息債，只要份工保得住就可以繼續分期攤還。較重就係卡數，卡數的實際年利率大都企穩三十厘以上，換言之你買內房的高息債，賺息都不足以還卡數高息。所以應趁經濟未算太衰前，想辦法清掉滾存卡數，例如利用低息貸款清掉卡數，變相把高息債合併為可以分期還款的低息債。

流動資金隨時「解鎖」

假如你真實身價係正數且習慣月月清卡數，手頭資金亦較鬆動，看到近期港股持續受壓，「盈轉虧」股份陸續登場，或會想借機入市撈平貨。

考慮是否入市，除了睇港股有幾抵買，亦要考慮自己在來年有幾需要流動資金。最實際的評估準則係自己份工有幾穩陣，假如你身處一些較受衝擊行業如零售、建造業、飲食業，你不單要觀察年尾有無得加人工，亦要留意老細行蹤及出糧方式兩大訊號。日前有調查指出，明年打工仔平均加薪幅度只有2.7%，更有35%受訪企業表示將凍結人手，平均數都如此難睇，「高危」行業公司就更可能要減薪及裁員。如果你係中小企員工，毋須向會計部阿頭打聽，單係留心老闆行蹤都可以評估公司有幾掂。假如老闆越來越少在公司現身，出糧又由過數改為出支票，而且出糧日由月尾順延至每月第一個星期某一日，甚至有風聲會再推遲，則意味你所屬公司有可能陷入「盈轉虧」危機。

應對公司缺水危機，除了開始積極物色轉工機會，你亦要大大力調整每月用錢節奏，確保份糧至少捱到下個月頭十日。另外亦要準備相當於半年人工應急基金以應付失業時生活開支，既然這筆錢在來年隨時有可能要「解鎖」，暫時就不太適合用來撈貨，選擇做定存賺息較為實際。

如果份工暫時算穩陣，想撈貨都應該選擇息率至少有三厘以上的藍籌股。不過重創的零售及飲食股暫時未宜沾手。想賺息亦可考慮買優質零售債券，例如蘋果發行的企業債息率都有二至三厘，入場費2000美元有交易。至於高息債券基金，市場上息率最高的選擇大都是投資中國或新興市場債券，對這兩個市場略有戒心的話，還是忍一忍手吧。